Soltústik Qazaqstan oblysyndaǵy sý tasqyny zardabyn joıý, qaýiptiń betin qaıtarý maqsatynda uıymdastyrylǵan jumystarǵa belsendi qatysqan Ulttyq ulan akademııasynyń kýrsanttary Memleket basshysynyń atynan qolsaǵattarmen marapattaldy.
Petropavl qalasynyń shaǵyn aýdandary men irgesinde ornalasqan eldi mekenderdi sýdan qorǵaý jumystarynda belsendi qyzmet atqarǵan Ulttyq ulan akademııasynyń 4-oqý batalonyna qarasty 3-bólimshesiniń komandıri, serjant Aıan Qalı, 1-oqý batalony 4-bólimshesiniń kýrsanty Asqar Jalelov, 1-oqý batalony 3-bólimshesiniń kýrsanty Roman Morkovınge Prezıdent Qasym-Jomart Toqaevtyń atynan arnaıy syılyq tabystaldy.
– Biz naýryz aıynyń sońynda bastalǵan tabıǵı apattan turǵyndardy, olardyń baspanalaryn qorǵaýǵa atsalysyp kelemiz. Tasqyn sýdy tejeý úshin bógetter turǵyzdyq. Memlekettik mańyzdy nysandy sýdan aman alyp qaldyq. Bizdiń maqsatymyz – sý tasqynynan zardap shekken turǵyndarǵa kómektesý. Memleket basshysy, Qarýly Kúshterdiń Joǵarǵy Bas qolbasshysy Qasym-Jomart Toqaevtyń osy qyzmetimizdi baǵalap jatqany bizdi qýantyp otyr, – dedi serjant A.Qalı.
Aıta keteıik, dál osyndaı qurmetke Petropavl qalasynda ornalasqan 6637 áskerı bóliminiń 7 jaýyngeri de ıe boldy.