Úkimette Premer-mınıstrdiń orynbasary – Ulttyq ekonomıka mınıstri Nurlan Baıbazarovtyń tóraǵalyǵymen ótken keńeste azamattardyń qarjylyq saýatyn arttyrýǵa baǵyttalǵan «Qaryzsyz qoǵam» jobasyn iske asyrý barysy talqylandy.
Atalǵan joba byltyr mamyr aıynda Qazaqstannyń 8 óńirinde bastaldy. Ol azamattarǵa bilikti qarjylyq jáne quqyqtyq kómek kórsetýdi, halyqtyń qarjylyq saýatyn arttyrýdy, azamattarǵa banktik qaryzdar men mıkrokredıtter boıynsha problemalyq bereshekti retteýge járdemdesýdi kózdeıdi.
Memleket basshysy Qasym-Jomart Toqaev «Ádiletti Qazaqstannyń ekonomıkalyq baǵdary» Joldaýynda jobanyń aýqymyn keńeıtýdi tapsyrdy. Qazirgi tańda joba barlyq oblystarda, sondaı-aq respýblıkalyq mańyzy bar Astana, Almaty jáne Shymkent qalalarynda júzege asyrylyp keldi. Jumysqa 11 memlekettik organ, 12 bank, Qazaqstan qarjygerler qaýymdastyǵy men Qazaqstannyń mıkroqarjy uıymdarynyń qaýymdastyǵy qosyldy.
«Amanat» partııasynyń hatshysy Eldar Jumaǵazıevtiń aıtýynsha, jyl basynan beri 43 myńnan astam adam oqýdan ótken. Olardyń 81%-y aýyldar men aýyldyq okrýgterdiń turǵyndary. Jobaǵa qatysýshylar sarapshylardyń dáristerinen bólek enbek.kz portalynda tirkelý men jeke kásipkerdi ashýdan bastap, sottan tys bankrottyqty súıemeldeý jáne bereshekti óteý kestesin qurý boıynsha keńester alýda.
«Biz el azamattary arasyndaǵy problemalyq nesıelerdiń úlesin azaıtýǵa ári halyqtyń qaryzǵa belsheden batýyna jol bermeýge tyrysamyz. Bul eń mańyzdy áleýmettik másele jáne osy rette partııa shette qala almaıdy. Qazir biz onyń saldarymen kúresip jatyrmyz. Sondyqtan qarjylyq saýattylyqty mektepterde, kolledjderde jáne JOO-da oqytý qajet dep sanaımyz. Osylaısha, qoǵamdaǵy qarjylyq mádenıet deńgeıiniń úlesin aıtarlyqtaı arttyra alamyz», dep atap ótti óz sózinde E.Jumaǵazıev.
Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanov «Qaryzsyz qoǵam» jobasyna azamattardy kóbirek tartý úshin jergilikti atqarýshy organdar men memlekettik organdardyń nazaryn jergilikti jerlerde aqparattyq jumysty kúsheıtý qajettiligine nazar aýdardy.
О́z kezeginde «Qaryzsyz qoǵam» jobasynyń jetekshisi Aqmaral Bekmurzaeva álemdik ozyq tájirıbelerdi eskere otyryp, qarjylyq saýattylyq boıynsha ádisteme men oqý-praktıkalyq materıaldardy ázirleýdiń mańyzdylyǵyna toqtaldy.
«Biz 513 myń adamnyń arasynda saýalnama júrgizdik. Olardyń ishinde muǵalimder, oqýshylar jáne ata-analar bar. Bilim berý úderisine qatysýshylar arasynda qarjylyq saýattylyqty oqytýdyń uıymdastyrylýy men nysany týraly biryńǵaı túsinik joq. Muǵalimderdiń 80%-y «Jahandyq quzyrettilik» páni aıasynda saýattylyqty oqytýǵa arnalǵan oqýlyqtar men ádebıetterdiń joqtyǵyn aıtady. Oqýshylardyń 60%-y pánge qyzyǵýshylyq tanytqanymen, onyń formaty ári materıaldardyń usynylýy unamaıtynyn kórsetken», dedi «Qaryzsyz qoǵam» jobasynyń jetekshisi A.Bekmurzaeva.
Oqý-aǵartý mınıstrliginiń Orta bilim berý komıteti tóraǵasynyń orynbasary Jomart Qarambaev muǵalimderge qarjylyq saýattylyq boıynsha da sabaq berý úshin biliktilikti arttyrý kýrstary júrgizilip jatqanyn habarlady.
Ǵylym jáne joǵary bilim vıse-mınıstri Dınara Sheglovanyń aıtýynsha, «Narxoz» ýnıversıtetinde bıyldan bastap barlyq joǵary oqý oryndarynda oqytylatyn «Qarjylyq saýattylyq» kýrsy ázirlengen. Jyl saıyn shamamen 100 myń stýdent qamtylady, olardyń basym bóligin birinshi kýrs stýdentteri quraıdy.
Keńesti qorytyndylaı kele, Premer-mınıstrdiń orynbasary – Ulttyq ekonomıka mınıstri Nurlan Baıbazarov halyq arasynda «Qaryzsyz qoǵam» týraly túsindirý jumystarynyń mańyzdylyǵyn atap ótti.
«Jobanyń paıdasyn bári túsinedi. Ony sapaly júzege asyrý – ortalyq jáne jergilikti memlekettik organdardyń ortaq mindeti. Barlyq jaýapty vedomstvolar oqý-ádistemelik quraldaryn ázirleý men jobany nasıhattaýǵa belsendi qatysýy kerek. Sondaı-aq aýyldardyń, shaǵyn jáne monoqalalardyń turǵyndaryn kásipkerlik qyzmetke tartý úshin qoldaý kórsetý quraldaryn keńeıtý qajet. Bul úshin qajetti resýrstar bar», dedi Premer-mınıstrdiń orynbasary.
Nurlan Baıbazarov ortalyq jáne jergilikti atqarýshy organdardyń basshylaryna jobany iske asyrý týraly halyqty aqparattandyrý jumysyn kúsheıtýdi, jobaǵa qatysýshylardy barynsha tartý qajettigin ári oqýshylar men stýdentter úshin qarjylyq saýatty arttyrý kýrsyn tıisti deńgeıde uıymdastyrýdy tapsyrdy.