Pavlodarda sý tasqynynan zardap shekken otbasylarǵa demeýshiler 208 mln teńgege kómek kórsetti. Bul qarajattyń 110 mln teńgesine Jalaýly aýlynda jańadan bes úı salynyp jatyr. Taǵy eki úı jalpy somasy 4,1 mln teńgege satyp alynǵan.
Qazirgi ýaqytta Pavlodar oblysy boıynsha sý tasqynynan zardap shekken turǵyndardyń barlyq ótinimi tolyq kólemde ótelgen. Demeýshilik qarajat esebinen 120 otbasy jalpy somasy 98 mln teńge ótemaqy aldy. Buǵan qosa atalǵan otbasylarǵa jergilikti bıýdjetten 100 aılyq eseptik kórsetkish kóleminde birjolǵy kómek tólengen.
– Aqtoǵaı aýdanynyń Jalaýly aýlynda 5 úı jáne Sharbaqty men Tereńkól aýdandarynda 2 úı qalpyna keltirýge jaramsyz dep tanylǵan. Jalaýly aýlynda demeýshi qarajatyna qazirgi kúni 5 úı salyna bastady. Ár baspananyń quny 22 mln teńge turady. Qurylysty aldaǵy úsh aı ishinde aıaqtaý kózdelgen. Buǵan qosa Sharbaqty aýdanynyń Krasılovka aýlynda turýǵa jaramaı qalǵan úı esepten shyǵarylyp, zııan shekken otbasyna demeýshi esebinen quny 1,1 mln teńge turatyn ózge baspana satyp áperildi. Al Tereńkóldiń Tomarly aýlynda turatyn otbasynyń úıi de sýdan zardap shekkeni sebepti demeýshiler 3 mln teńge turatyn baspanany syıǵa tartty. Osylaısha oblys boıynsha jaramsyz dep tanylǵan 7 úıdiń barlyq shyǵynyn demeýshiler kóterip otyr, – deıdi Pavlodar oblysy ákimi apparatynyń basshysy Dıdar Elýbaev.
Onyń aıtýynsha, aımaqtaǵy turǵyn úılerdi sý basý qaýpi tolyǵymen joıyldy. Oblystyq shtab táýlik boıy jumys istep tur. Joǵaryda atalǵan 98 mln teńge tasqyn sýdan dúnıe-múlikteri, úı tehnıkalary men aspaptary, sharýashylyq ǵımarattary búlingen otbasylarǵa ótemaqy retinde tólengen. Kómektiń eń az mólsheri – 70 myń, al eń kóbi 6 mln teńge bolǵan.
Buǵan deıin Úkimet basshysy tasqynnan zardap shekkenderge turmystyq tehnıka alatyn aqsha da beremiz dep málimdegen edi. Qarǵyn sýǵa baılanysty naýryz aıynda tótenshe jaǵdaı jarııalanǵan Jalaýly aýlynda turǵyndardyń ótinimderin jergilikti komıssııa muqııat qarastyryp jatyr. Joǵaryda atalǵan kómekterden bólek, otbasylarǵa aýdan qarajaty esebinen 150 aılyq eseptik kórsetkishke deıin ótemaqy tólenedi dep kútilip otyr.
Jalaýly aýlyndaǵy 6 úıdiń qurylysyn ERG toby óz moınyna aldy. Aýyl aınalasynda búginde 6 km qorǵanys bógeti salyndy. Oıpań jerde ornalasqan eldi mekenniń qarǵyn sýǵa qatysty máselesin keshendi túrde sheshý úshin kólemi 200 myń tekshe metr bolatyn 3 qazanshuńqyr qazyldy.
Pavlodar oblysy