Stambulda kúres túrlerinen ótetin olımpıadalyq irikteý týrnırinde Qazaqstan sapynan baq synaıtyn eki balýannyń esimi anyqtaldy, dep habarlaıdy Egemen.kz.
Dúbirli dodaǵa 67 kelidegi salmaqta Dinmuhammed Qoshqar jáne 97 kelide Iýsýf Masıev qatysady. Bul týraly Kaz_wrestling telegram-arnasynan málim boldy.
Parıj Olımpıadasyna joldama úlestiretin álemdik irikteý básekesi mamyr aıynyń 9-12 kúnderi ótedi. Atalǵan jarysqa elimizdiń grek-rım, erkin jáne áıelder kúresi quramalary qatysady.
Aıta ketsek, ázirge ulttyq quramada 4 joldama bar: buǵan deıin grek-rım kúresi balýandary Bishkekte ótken Azııa aımaqtyq irikteý týrnırinde 3 joldamaǵa ıe bolǵan. Joldamaǵa Aıdos Sultanǵalı (60 keli), Demeý Jadyraev (77 keli), Álimhan Syzdyqov (130 keli) qol jetkizgen. Sondaı-aq 2023 jylǵy álem chempıonatynda Nursultan Tursynov (87 keli) joldama jeńip alǵan edi.