7 mamyr - QR Qarýly Kúshteriniń qurylǵan kúni. Bul kúndi el azamattary Otan qorǵaýshylar kúni retinde jyl saıyn atap ótedi, dep habarlaıdy Egemen.kz.
1991 jyly 25 qazanda Qazaqstan Prezıdentiniń Jarlyǵymen Qazaq SSR Memlekettik qorǵanys komıteti jasaqtaldy. Keıin ol Qazaqstan Respýblıkasynyń Qorǵanys mınıstrligi bolyp qaıta quryldy.
1992 jyldyń 7 mamyrynda QR Tuńǵysh Prezıdentiniń arnaıy Jarlyǵy shyqqan edi. Bul Jarlyq boıynsha, respýblıka aýmaǵyndaǵy KSRO Qarýly Kúshteriniń quramyndaǵy mekemeler, bólimder, quramalar Qazaqstan Respýblıkasynyń quzyretine berildi. Joǵarǵy Bas Qolbasshy retinde Qarýly kúshterdi basqarýdy Prezıdent óz moınyna aldy. Prezıdentten basqa qorǵanys isimen tikeleı shuǵyldanatyn alǵashqy Qorǵanys mınıstri qyzmetine general-polkovnık Saǵadat Nurmaǵambetov taǵaıyndaldy.
7 mamyr Qazaqstanda merekelik demalys kúni bolyp sanalady. Mereke qarsańynda Joǵarǵy Bas qolbasshy Qasym-Jomart Toqaev kezekti áskerı shender berý týraly Jarlyqqa qol qoıyp, erekshe kózge túsken áskerı qyzmetkerlerdi marapattaıdy.
Bıyl da Memleket basshysy – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev joǵary áskerı arnaýly ataqtar men synyptyq shender berý týraly Jarlyqqa qol qoıǵany týraly habarlaǵan edik.