Astanada Úkimet basshysy Oljas Bektenov pen Malaızııa Premer-mınıstri Anýar Ibragım eki eldiń bıznes-qoǵamdastyqtary men ǵylymı toptary ókilderiniń qatysýymen Qazaqstan-Malaızııa ınvestısııalyq dóńgelek ústelin ótkizdi.
Ekonomıkanyń basym salalaryndaǵy yntymaqtastyqty arttyrý keleshegi talqylandy.
Oljas Bektenov Malaızııa elimizdiń Ońtústik-Shyǵys Azııadaǵy negizgi saýda-ekonomıkalyq áriptesterdiń biri ekenin atap ótti. Bir jyl ishinde ekijaqty taýar aınalymy $150 mln-nan shamamen $245 mln-ǵa deıin ósti. Maqsat – ekonomıkalardyń qolda bar áleýetin ashý jáne ekijaqty saýda kórsetkishin pandemııaǵa deıingi $650 mln-nan asyrý.
«Bizdiń memleketterimizdiń arasyndaǵy tyǵyz saıası dıalog ózara seriktestiktiń berik negizin qalaıdy. Elimizdiń Prezıdenti Qasym-Jomart Toqaev pen Sizdiń kezdesýińiz ekijaqty qarym-qatynastardyń damýyndaǵy mańyzdy tarıhı kezeń boldy. Qazaqstan Úkimeti joǵary deńgeıde qabyldanǵan barlyq ýaǵdalastyqty iske asyrýǵa daıyn ekenin bildiredi», dep atap ótti O.Bektenov.
Úkimet basshysy Qazaqstannyń Malaızııaǵa eksportty ártaraptandyrý nıeti týraly málimdep, malaızııalyq kásipkerlerdi qyzmet kórsetý, óńdeý ónerkásibi, qarjy, bilim berý, jer qoınaýyn paıdalaný, aýyl sharýashylyǵy jáne qurylys salalaryndaǵy seriktestigin nyǵaıtýdyń jańa múmkindikterin birlesip zerdeleýge shaqyrdy. Búginde Qazaqstanda malaızııalyq kapıtaldyń qatysýymen 48 kompanııa jumys isteıdi. Jalpy somasy $410 mln-nan astam 17 birlesken ınvestısııalyq joba iske asyrylyp keledi.
О́z kezeginde Malaızııa Premer-mınıstri Anýar Ibragım memleketaralyq is-qımyldyń oń dınamıkasyn atap ótti. Keıingi jyldary eki el arasyndaǵy taýar aınalymynyń ósimi 30%-dan asty. Malaızııa Qazaqstanmen týrızm, bilim berý, energetıka salalarynda, sondaı-aq otandyq halal ónimderdi jetkizý salasynda yntymaqtastyqty nyǵaıtýǵa nıetti. Budan basqa, áleýeti basym baǵyttar boıynsha birlesken jobalar sanyn kóbeıtý qajettigi atap ótildi.
Dóńgelek ústelge qatysýshylarǵa Qazaqstanda elimizdiń ınvestısııalyq tartymdylyǵyn arttyrý jónindegi júıeli sharalardyń iske asyrylýy týraly aıtyldy. Investorlarǵa salyq jáne kedendik jeńildikter beriledi, konsaltıngtik jáne ınfraqurylymdyq qoldaý kórsetilip keledi.
Dóńgelek ústel aıasynda elimizdiń jáne malaızııalyq bıznes ókilderi naqty kelissózder júrgizdi. Malaızııa Parlamentiniń senatory, Ulttyq kásipkerler jáne ındýstrııa palatasynyń (NCCIM) prezıdenti Loý Kıan Chýan Qazaqstan Malaızııanyń Ortalyq Azııa aımaǵyndaǵy mańyzdy ári eń úlken strategııalyq seriktesi ekenin atap ótti.
Dóńgelek ústel alańynda ınvestısııalyq baılanystardy tereńdetý jáne jańa naryqtardy birlesip ıgerý týraly ýaǵdalastyqqa qol jetkizildi jáne jalpy somasy $350 mln-nan asatyn kelisimder men memorandýmdarǵa qol qoıyldy. Islam qarjysyn jáne saýdany damytý, sondaı-aq azyq-túlik ónerkásibi, taý-ken salalaryna ınvestısııalar tartý, altyn óńdeý jáne transformator men avtomobıl maıyn birlesip óndirý salalarynda yntymaqtastyq ornatý josparlanǵan.
Ýaǵdalastyqtardy júzege asyrý eki eldiń tabysty yntymaqtastyǵyn keńeıtý jolyndaǵy mańyzdy qadam bolmaq.