Birinshi toqsannyń qorytyndysy boıynsha jolaýshylar temirjol kóligi salasyndaǵy negizgi kapıtalǵa salynǵan ınvestısııa 83,1 mlrd teńgege jetti. Bir jyl buryn kórsetkish 4,7 mlrd teńge bolǵan. Aıyrmashylyq jer men kókteı. Al júk temirjol salasyndaǵy kapıtaldy salym 28,5 mlrd teńgeni quraǵan. О́tken jyldyń uqsas kezeńimen salystyrǵanda 49,3 paıyzǵa tómen.
О́ńirlik bólinis turǵysynan jolaýshylar temirjol kóligi salasyna tıesili ınvestısııanyń basym bóligin – 45,3 mlrd teńgeni Astana ıelengen. Júk temirjol kóligi boıynsha da elorda alda – 21,5 mlrd teńge. Úshtikke Almaty men Qyzylorda oblysy kiredi.
Bıylǵy úsh aıda temirjol kóligi 5,2 mln jolaýshyny tasymaldaǵan. Bir jylmen salystyrǵanda kórsetkish 8,1 paıyzǵa artqan. Sonymen qatar poıyzdar 96,9 mln tonna júk tasyǵan.
«Naýryzdyń qorytyndysy boıynsha poıyzben tasymaldaý baǵasy 5 paıyzǵa ósti. Sonyń ishinde qala mańyndaǵy poıyzben júrý bir jylda 8,6 paıyzǵa qymbattady. Jyldyq ósim Almatyda (28,3 paıyzǵa), Soltústik Qazaqstan oblysynda (15,8 paıyzǵa) jáne Aqmola oblysynda (15,2 paıyzǵa) baıqaldy», dep málimdeıdi «Finprom» taldaý ortalyǵy.
Al poıyzben júk tasymaldaý kólemi – 96,9 mln tonna. Byltyrǵydan 3,5 paıyzǵa tómen. Bul turǵyda basym kórsetkish Pavlodar oblysyna (10,6 mln tonna), Astana qalasyna (10,5 mln tonna), Aqtóbe oblysyna (8,8 mln tonna) tıesili.
Al áýe tasymaly salasyna jiberilgen ınvestısııa kólemi birinshi toqsanda 14 mlrd teńge bolypty. Byltyr kórsetkish 2 mlrd teńgeden áreń asqan-dy. Demek bul baǵytta da ájeptáýir ilgerileý bar degen sóz.
Sáýir aıynyń qorytyndysynda áýe jolaýshylar tasymaly baǵasy 3 paıyzǵa ósken (ótken jyldyń sáýir aıymen salystyrǵanda). Bılet qymbatshylyǵy, ásirese Túrkistan oblysynda (30,5 paıyzǵa), Qostanaı oblysynda (28,9 paıyzǵa), Shymkent qalasynda (22,7 paıyzǵa), Shyǵys Qazaqstan oblysynda (19,1 paıyzǵa), Soltústik Qazaqstan oblysynda (15,7 paıyzǵa) sezilgen. Pavlodar oblysynda az ǵana qymbattasa (0,5 paıyzǵa), Aqtóbe, Qaraǵandy, Jambyl, Mańǵystaý, Jetisý jáne Abaı oblystarynda kerisinshe baǵa tómendegen.
«Bıyl ádepkide úsh aıda áýe kóligi qyzmeti salasyndaǵy negizgi kapıtalǵa salynǵan ınvestısııa 13,9 mlrd teńgeni qurady. Bir jyl burynǵy kórsetkishten 6 ese kóp. Kapıtaldyq salymnyń barlyq kólemi kompanııalardyń jeke qarajaty esebinen qamtamasyz etildi. О́ńirlik bóliniste ınvestısııanyń negizgi bóligi Almaty qalasyna (11,4 mlrd teńge) tıesili boldy. Al áýe kompanııalarynyń tabysy 16,2 paıyzǵa, 179,3 mlrd teńgege ósti. Sonyń ishinde, júk pen bagaj tasymaldaýdan túsken tabys 3,2 mlrd teńgege jetti. Jolaýshylardan túsken tabys sáıkesinshe – 176 mlrd teńge», dep habarlaıdy «Finprom».
Jalpy, bıylǵy úsh aıda áýe kóligi arqyly 3,3 mln jolaýshy dittegen mekenine jetken. Byltyrǵydan 20,2 paıyzǵa kóp, jyl sanap jolaýshy tasymaly aǵyny artyp kele jatyr. О́ńirlik bóliniste eń kóp tasymal úlesi Almaty qalasynyń enshisinde – 1,2 mln adam. Odan keıin Astana qalasy – 916 myń adam, Shymkent qalasy – 268,8 myń adam, Mańǵystaý oblysy – 233,1 myń adam, Atyraý oblysy – 189,9 myń adam.