Senat Spıkeri Máýlen Áshimbaevtyń tóraǵalyǵymen ótken Palata janyndaǵy Sarapshylar klýby otyrysynda eldiń ekonomıkalyq damýyna qatysty ózekti máseleler talqylandy. Is-sharaǵa Dúnıejúzilik banktiń Qazaqstan men Túrikmenstandaǵy ókili Andreı Mıhnev jáne belgili ekonomıst Azamat Aǵaıdarov qatysty, dep habarlaıdy Egemen.kz joǵarǵy Palatanyń baspasóz qyzmetine silteme jasap.
«Prezıdentimiz byltyrǵy Joldaýynda ekonomıkalyq damýdyń jańa úlgisin qalyptastyrýdyń baǵdaryn belgilep berdi. Qazirgi ýaqytta bul baǵytta naqty nátıjelerdi kórip otyrmyz. Ekonomıkany yryqtandyrý jónindegi sharalar týraly Memleket basshysy qol qoıǵan Jarlyq jeke menshikke qolsuǵylmaýshylyqty, jeke kásipkerlik qyzmetiniń erkindigin jáne memlekettiń ekonomıkaǵa qatysýyn qysqartýdy qamtamasyz etýge arnalǵan. Elimizdiń aldynda 2029 jylǵa qaraı ulttyq ekonomıkanyń kólemin 2 esege ulǵaıtýǵa qatysty aýqymdy mindet tur. Sondyqtan búgingideı jahandyq turaqsyzdyq jaǵdaıynda ekonomıkany damytýdyń jańa, standartty emes tásilderin tabý asa mańyzdy», dedi Máýlen Áshimbaev.
Is-shara barysynda qatysýshylar Dúnıejúzilik banktiń baıandamasynda aıtylǵan zertteý nátıjeleri men yqtımal táýekelderdi talqylady. Bul rette sarapshylar ekonomıkalyq yntalandyrýdyń baıaýlaýy, ekonomıkalyq teńsizdik jáne IJО́-degi jalaqynyń tómen úlesi sııaqty máselelerge basa nazar aýdardy.
Klýb músheleri kóterilgen máselege qatysty pikir bildirip, salyq júıesin jetildirýge jáne ulttyq ekonomıkany basqarýdyń jańa tetikterin qalyptastyrýǵa arnalǵan usynystaryn aıtty. Sondaı-aq otyrysta birlesken jobalardy iske asyrý barysy men aldaǵy ózara is-qımyldyń formaty talqylandy.
Sonymen qatar kezdesýde Ulttyq ekonomıka birinshi vıse-mınıstri Tımýr Jaqsylyqov, Maqsut Narikbayev University Halyqaralyq ekonomıka mektebiniń dekany Sáýle Kemelbaeva, Applied Economics Research Centre basqarýshy dırektory Evgenııa Pak, makroanalıtık Aıakóz Hanet jáne taǵy basqa sarapshylar sóz sóıledi.
Sondaı-aq otyrysta Klýbtyń jańa músheleri tanystyryldy. Aıta ketsek, Klýb qurylǵan tórt jyldan beri alǵash ret rotasııa júrgizilip otyr. Nátıjesinde quramynyń 60 paıyzdan astamy jańardy.