Ystanbulda Túrki ınvestısııalyq qoryna múshe Basqarýshy elder keńesiniń (TIQ) alǵashqy ulyqtaý otyrysy ótti. Premer-mınıstrdiń orynbasary – Ulttyq ekonomıka mınıstri Nurlan Baıbazarov Qazaqstan tarapynan Qordyń Basqarýshylar keńesiniń ókili boldy.
Túrki ınvestısııalyq qory – túrki álemi ekonomıkalyq ıntegrasııasynyń alǵashqy birlesken qarjy ınstıtýty. Qordyń bastapqy kapıtaly $500 mln-dy quraıdy. Ony qurýdyń basty maqsaty – Túrki elderi arasyndaǵy ekonomıkalyq jáne kommersııalyq qatynastardyń damýyn qamtamasyz etý. Túrkııa Qarjy mınıstrliginiń baǵalaýynsha, 2024 jyldyń sońyna qaraı túrki memleketteri álemdik ekonomıkada mańyzdy oryn alady. Iаǵnı ekonomıka kólemi $1,9 trln-ǵa jáne halyq sany 178 mln adamǵa jetedi dep kútiledi.
Nurlan Baıbazarov Qazaqstan úshin túrki ıntegrasııasyn damytýdyń aıryqsha mańyzdy ekenin atap ótti:
«Qazaqstan Respýblıkasynyń Úkimeti Qor qyzmetiniń bastalýyn tolyǵymen qoldaıdy. Atalǵan Qor qatysýshy elderdiń ekonomıkalyq ósýi men damýynyń katalızatory bolatynyna jáne ınvestısııalyq yntymaqtastyqty tereńdetýge ári birlesken jobalardy iske asyrýda tıimdi ózara árekettestikke yqpal etetinine senimdimin», dedi ol.
Qor qyzmeti barysynda ınfraqurylymdy, jańartylatyn energııa kózderin, aýyl sharýashylyǵyn, týrızmdi, IT jáne basqa da baǵyttardy qamtıtyn túrli sektorlardaǵy birlesken jobalardy qoldaýǵa basty nazar aýdarylady.
Mundaı jobalardy iske asyrý jańa jumys oryndaryn qurý, ekonomıkany ártaraptandyrýǵa baǵyttalady. Qazaqstanǵa túrki áleminiń belsendi qatysýshysy bolýǵa, jobalar úshin qarjylandyrý, granttar men tehnıkalyq kómek alýǵa, sondaı-aq Túrki memleketteri uıymynyń óńiri aıasynda jáne odan tys jerlerde saýda-ekonomıkalyq yntymaqtastyqty nyǵaıtýǵa múmkindik beredi.
Eske sala keteıik, Túrki ınvestısııalyq qoryn qurý týraly kelisimge 2023 jyldyń 16 naýryzynda Ankarada ótken Túrki memleketteri uıymynyń kezekten tys sammıti aıasynda qol qoıylǵan bolatyn. Quryltaıshy elder qatarynda Ázerbaıjan, Qazaqstan, Qyrǵyzstan, О́zbekstan, Túrkııa bar.