Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip eńbek jáne halyqty áleýmettik qorǵaý mınıstri Svetlana Jaqypovamen kezdesip, taraptar eńbek qaýipsizdigi, eńbekti qorǵaý, áleýmettik qamsyzdandyrý, mindetti áleýmettik saqtandyrý, zııandy eńbek jumysymen aınalysatyn adamdardy qorǵaý jónindegi máselelerdi talqylady, dep habarlaıdy Egemen.kz Senattyń baspasóz qyzmetine silteme jasap.
Senator áleýmettik-eńbek salasyndaǵy memlekettik saıasatty iske asyrý, eńbek naryǵynyń aǵymdaǵy jaı-kúıi men damý keleshegin baǵalaý, sondaı-aq jumyssyz azamattardy qoldaý sharalary men halyqty jumyspen qamtýdy yntalandyrý máselesine depýtattar erekshe nazar aýdaryp otyrǵanyn atap ótti.
«Prezıdent Joldaýynda eńbek naryǵyn damytý jáne qaýipsizdik máselelerine erekshe nazar aýdaryp, eńbek naryǵyndaǵy túbegeıli ózgeristerdi, onyń ishinde jarty mıllıonnan astam adamdy qamtıtyn sıfrlyq ekonomıka men jumyspen qamtý tuǵyrnamalyq turǵyda óse túskenin jáne osy sanattaǵy azamattardyń eńbek quqyqtaryn qorǵaý jáne jumyspen qamtýdy tuǵyrnamalyq túrde retteý tetikterin ázirleý qajettigin atap ótti. Sondaı-aq, óndiristegi jaraqattaný deńgeıiniń joǵary ekeni týraly másele kóterildi, kásibı qaýipterdiń aldyn alý úshin qujattardy ázirleý týraly mınıstrlikke tapsyrma berildi. Parlament Prezıdent aıtqan mindetter men maqsattardy basym dep sanaıdy, sondaı-aq tapsyrmalardy ýaqytyly jáne sapaly oryndaý úshin osy mindetterdi iske asyrýda jan-jaqty kómek kórsetýge daıyn», dedi Nurtóre Júsip.
Svetlana Jaqypova óz kezeginde qaýipsiz eńbek jaǵdaıyn jasaý, jumyssyzdyqtyń aldyn alý, áleýmettik qamsyzdandyrý salasynda ýaqytynda memlekettik qyzmet kórsetý ári sapasyn jaqsartý, sondaı-aq áleýmettik-eńbek salasyndaǵy normatıvtik-quqyqtyq aktilerdi jetildirýge baǵyttalǵan mınıstrliktiń jumysy týraly aıtyp berdi.
Taraptar kezdesý qorytyndysy boıynsha úderisterdi ońtaılandyrý men áleýmettik qorǵaý jáne eńbek qatynastarynyń neǵurlym ashyq ári qoljetimdi júıesin qurýǵa baǵyttalǵan ınnovasııalyq tehnologııalardy engizý máselelerin talqylady.