Ishki ister mınıstrligi ózderin polısııa qyzmetkerleri retinde tanystyryp júrgen bir top adamǵa qatysty pikir bildirdi, dep habarlaıdy Egemen.kz.
WhatsApp jelisinde ózderin polısııa qyzmetkerleri retinde tanystyryp júrgen bir top adam úı-úıdi aralap júrgeni týraly habarlama tarap jatyr. Olar aldaǵy halyq sanaǵy aldynda barlyǵynda jaramdy jeke kýáligi bar-joǵyn tekserý kerek ekenin alǵa tartady. Bul rette olar Ishki ister mınıstrliginiń rámizderi bar qujattar men blankilerdi usynady.
«Olar jalǵan forma kıip alyp, úılerdi aralap, urlyqqa túsedi. Bóten adam úıińizge kelip: «Men sizdiń fotosýretińizdi/saýsaq izińizdi qandaı da bir shemanyń bóligi retinde alýym qajet» dep aıtýy múmkin. Olarda noýtbýk, bıometrııalyq qurylǵy jáne azamattardyń aty-jóni jazylǵan tizim bar. Olar tizimdi kórsetip, joǵary aıtylǵan aqparttardy alýǵa tyrysady», delingen habarlamada.
Vedomstvonyń málimetinshe, Ishki ister mınıstrliginiń qyzmetkerleri mundaı tekseris júrgizbeıdi.
«Mundaı alaıaqtyq faktileri respýblıka aýmaǵynda tirkelgen joq. IIM jeke kýálikterin tekserý, sýretke túsirý jáne saýsaq izderin alý maqsatynda turǵyndar arasynda tekseris júrgizbeıdi. Qylmystyq Kodekstiń 274-babyna sáıkes kórineý jalǵan aqparat taratqany úshin qylmystyq jaýapkershilik kózdeletini týraly eskertemiz», dep habarlady vedomstvonyń baspasóz qyzmeti.
Ishki ister mınıstrligi azamattardy qyraǵy bolýǵa jáne jeke derekter týraly aqparatty beıtanys adamdarǵa bermeýge shaqyrady.