Qazaqstannyń Memlekettik keńesshisi Erlan Qarınniń «Egemen Qazaqstan» gazetinde «Birlik pen damý: Memleket basshysy Qasym-Jomart Toqaevtyń saıası baǵdarynyń basty negizderi» maqalasy jarııalandy. Atalǵan maqalanyń «Jańa ıdeologııalyq tuǵyrnama» taqyrypshasynda Prezıdenttiń 2019 jyldan beri dáıekti túrde júrgizip kele jatqan, ıdeologııalyq sıpaty «Ádiletti Qazaqstan» tujyrymdamasynda kórinis tapqan saıasaty basty bes tujyrymǵa negizdelgenin, Prezıdent onyń árqaısysyn ártúrli kezeńde usynyp, saıası ómirge birtindep engizip kele jatqanyna toqtaldy, dep habarlaıdy Egemen.kz.
Erlan Qarınniń jazýynsha «Ártúrli pikir – birtutas ult» atty alǵashqy tujyrym «Ádildik jáne Ádiletti Qazaqstan degenimiz ne?» degen saýalǵa jaýap beredi. Ádiletti Qazaqstandy qurý jolynda teńquqylyq qaǵıdaty óte mańyzdy. «Halyq únine qulaq asatyn memleket» atty ekinshi tujyrym «ádildik QALAI ornaıdy?» degen saýalǵa «el-jurtpen tyǵyz baılanysta bolyp, olardyń muń-muqtajyn tyńdaı bilý arqyly ornyǵady» dep jaýap berýge negizdelgen. Tujyrymdama elimizdi damytýǵa qatysty basty máseleler boıynsha qoǵamnyń barlyq ókiliniń pikirin eskere otyryp, baıypty ári ortaq sheshim qabyldanatynyn ańǵartady. «Halyq únine qulaq asatyn memlekettiń» jarqyn mysaly retinde Konstıtýsııaǵa ózgerister engizý úshin ótkizilgen referendýmdy aıtýǵa bolady.
«Úshinshi tujyrym – «Zań jáne tártip» ádildik ornatýdyń ádis-tásilderin aıqyndaıdy, ıaǵnı «Ádildikti qandaı jolmen ornatamyz?» degen saýalǵa jaýap beredi. Zańdy múltiksiz saqtaý, barshanyń zań aldynda teń bolýy, eń bastysy zań buzǵan adamnyń qalaıda jazasyn alýy – qoǵamda ádildikti ornyqtyrýdyń basty sharty. Osynyń bárin is júzinde oryndaý óte mańyzdy. Bul, ásirese, turmystyq-otbasylyq zorlyq-zombylyqqa, jemqorlyqqa qarsy kúreske qatysty oqıǵalardan aıqyn kórinedi», deıdi avtor.
«Tórtinshi tujyrym – «Kúshti Prezıdent – yqpaldy Parlament – esep beretin Úkimet» Ádiletti Qazaqstannyń ınstıtýsıonaldyq aýqymyn aıqyndaıdy, ıaǵnı «Ádiletti Qazaqstan» qandaı bolýy kerek?» degen suraqqa jaýap beredi. 2019–2021 jyldardaǵy saıası reformalardyń tórt toptamasy jáne 2022 jylǵy saıası jańǵyrý baǵdarlamasy osy tujyrymdy naqty júzege asyrýǵa arnaldy. Sonyń nátıjesinde bılik tarmaqtary arasynda tıimdi tepe-teńdik júıesi bar memlekettik qurylymnyń jańa ınstıtýsıonaldyq úlgisi qalyptasty», dep jazǵan.
Memlekettik keńesshiniń jazýynsha besinshi tujyrym – «Adal azamat» uǵymy «Ádiletti Qazaqstandy KIM qalyptastyrady?» degen saýalǵa jaýap bere otyryp, el-jurtymyzdyń rýhanı-adamı kelbeti bolashaqta qandaı bolatynyn jáne azamattyq qoǵam qalaı damıtynyn kórsetedi. Ideologııalyq tuǵyrnama týraly aıtqanda myna máselege nazar aýdarǵan jón. Bul – qandaı da bir qatyp qalǵan qaǵıdalardy úgit-nasıhat arqyly jasandy túrde jappaı sanaǵa sińirý emes, kerisinshe, bizdiń qoǵamnyń rýhanı birligin nyǵaıta túsetin shynaıy qundylyqtardy dáripteý degen sóz.
«Jalpy, Memleket basshysy usynǵan ıdeologııalyq tuǵyrnama elimizdi odan ári jan-jaqty jańǵyrtýǵa qatysy bar salalardyń bárine tyń serpin beredi», dep túıindeıdi Erlan Qarın.