Qasym-Jomart Toqaevtyń pikirinshe, medısına, farmasevtıka jáne bıotehnologııa salalaryndaǵy yntymaqtastyqty nyǵaıtý úshin zor múmkindikterge jol ashylyp otyr, dep habarlaıdy Egemen.kz Aqordanyń baspasóz qyzmetine silteme jasap.
– Pfizer, Roche, GE Healthcare jáne Philips sekildi álemge áıgili kompanııalar elimizde dári-dármek pen medısınalyq qural-jabdyqtardyń jergilikti óndirisin ashpaq. Ońtústik Koreıanyń GL Rapha kompanııasy Almatydaǵy bıofarmasevtıka zaýytynyń qurylysyna kóp uzamaı kirisedi dep úmittenemin. Bul naryq standarttaryn edáýir joǵarylatady. Sondaı-aq elimizde Ońtústik Koreıanyń dıagnostıka ortalyqtary men kópbeıindi zerthanalaryn ashýdyń keleshegi zor, – dedi Memleket basshysy.
El Prezıdenti Qazaqstannyń koreıalyq seriktesterimen jasandy ıntellekt tehnologııasyn damytý, data-ortalyqtar salý jáne kıberqaýipsizdikti qamtamasyz etý baǵyttary boıynsha birlese jumys isteýge daıyn ekenin atap ótti.
– Astana halyqaralyq qarjy ortalyǵy bizdiń básekege qabiletti ınvestısııalyq ortamyzdyń berik negizi sanalady. Bizdiń aımaqtaǵy bul biregeı alańda álemdegi jetekshi qarjy ortalyqtarynyń artyqshylyqtary barynsha eskerilgen. Búginde AHQO-da álemniń ondaǵan elinen eki myńnan astam kompanııa tabysty jumys istep jatyr. Onyń ishinde Ońtústik Koreıadan 20-ǵa jýyq kompanııa bar. Biz qarjy tehnologııasy, IT, aktıvterdi basqarý jáne lızıng salalarynda mundaı kompanııalardyń sany kóbirek bolǵanyn qalaımyz. Bul rette Ońtústik Koreıanyń BNK Finance Kazakhstan mıkroqarjy uıymy tolyqqandy ekinshi deńgeıli bankke aınalýyn quptaımyz, – dedi Qasym-Jomart Toqaev.Memleket basshysy óz sózin qorytyndylaı kele, búgingi forým eki eldiń kúsh-jigerin biriktirýge jáne tabysty kooperasııasyna tyń serpin beretinine senim bildirdi.
– Búgin men K-Silk Road tujyrymdamasyn tolyq qoldaıtynymyzdy aıttym. Shyn máninde, bul – óte mańyzdy tujyrymdama. Qazaqstan atalǵan baǵdarlamany iske asyrý úshin qoldan kelgenniń bárin jasaıdy. Prezıdenttiń aıtýynsha, kelesi jyly osy tujyrymdamanyń aıasynda Koreıada sammıt ótkizý josparlanyp otyr. Qazaqstan bul jıynǵa jan-jaqty atsalysady dep oılaımyn. Qazaqstan Úkimeti elimizde jumys isteýge nıetti ońtústikkoreıalyq kompanııalar men ınvestorlarǵa qajetti qoldaý kórsetedi, – dedi Prezıdent.Forýmda Koreıa Respýblıkasynyń Prezıdenti Iýn Sok Iol, Koreıanyń halyqaralyq saýda qaýymdastyǵynyń tóraǵasy (Iskerlik keńestiń teń tóraǵasy) Djın Sık Iýn, «Samuryq-Qazyna» AQ basqarma tóraǵasy Nurlan Jaqypov, Hyundai Motor Russia & CIS óńirlik shtab-páteri basshysynyń orynbasary Im Dje Ý, Astana Motors kompanııasynyń bas dırektory Beknur Nesipbaev, Doosan Enerbility kompanııasynyń vıse-prezıdenti Iаng Iýn Ho, «Qazaqstan temir joly» UK» AQ basqarma tóraǵasynyń strategııa jáne sıfrlandyrý jónindegi orynbasary Ánýar Ahmetjanov, SK Ecoplant kompanııasynyń Almaty qalasyndaǵy fılıalynyń dırektory Lı Djýn Hek, Qyzylorda oblysy ákiminiń orynbasary Ardaq Zebeshev jáne taǵy basqalar sóz sóıledi.
Qyrmyzy JUMAǴALIQYZY,
EUÝ stýdenti