Jetisýdy agrarly óńir degenimizben, tabıǵaty kórkem ólke ekenin de umytpaǵan abzal. Bolashaqta týrızmniń de bir oshaǵy bolaryna senim mol. Sebebi jyldan-jylǵa osy salanyń baǵyty jandanyp keledi. Máselen, byltyrdan beri qolǵa alynǵan «Shaǵan» festıvali bıyl da joǵary deńgeıde ótti. Taý týrızmin damytýǵa baǵyttalǵan bastamaǵa myńǵa jýyq adam atsalysqan. Qyzyqqa toly saıahat sheteldikterdi de qyzyqtyryp keledi.
Memleket basshysy Jetisýdyń týrızm salasyna kúsh salý kerektigin aıtqany áli esimizde. Osy rette Jetisýdyń jeti keremetine aınalyp ketken ǵajaıyp jerlerge týrısterdi tartý jobalary qolǵa alynyp jatyr.
«Jalpy, oblysta týrıstik nysandar jetkilikti. Sondyqtan onyń bárine tıisti deńgeıde mán berip, damytý kerek. Týrızm Jetisý oblysy ekonomıkasynyń basym baǵyty bolýǵa tıis. Týrıster neǵurlym kóbirek kelse, oblysqa da oń septigin tıgizedi. Oblystyń týrızm salasyndaǵy áleýeti óte zor», degen edi Qasym-Jomart Toqaev. Sodan beri tabıǵat syıǵa bergen týrıstik oryndarda ınfraqurylym júıelerin jandandyrý jumysy júrip jatyr. Al «Shaǵan» festıvali taý týrızmine týrısterdi ǵana emes, jergilikti turǵyndardy da tartýǵa jol ashady. Bıyl ekinshi ret uıymdastyrylyp otyrǵan sporttyq-týrıstik festıval joǵary deńgeıde ótti.
Mundaǵy maqsat – salamatty ómir saltyn, sportpen turaqty shuǵyldanýdy nasıhattaý, óńirde taý jáne ekologııalyq týrızmdi damytý múmkindikterin kórneki túrde pash etý. Eń bastysy, byltyr shaqyryp keltire almaǵan adamdar, bıyl aldyn ala festıvalǵa daıyndyq jasaǵan. Tipti sheteldik azamattar da keler jyly qatysýǵa nıet bildirip otyr. О́ńir ákiminiń baspasóz qyzmetiniń málimetinshe, Shaǵan shyńyn baǵyndyrýǵa kelgender 13 shaqyrymǵa kóterilip, teńiz deńgeıinen 2 551 metr bıikke shyqqan. Bul rette eń jas qatysýshy 5 jasta bolsa, eń úlkeni 70 jasta bolǵan.
Osy jyly «Visit Zhetysu» týrıstik-aqparattyq ortalyǵy oblystyń kásipkerlik jáne ındýstrııalyq-ınnovasııalyq damý basqarmasymen birlesip, Kóksý aýdandyq ákimdiginiń qoldaýymen «Shagan Fest-2024» festıvalin burynǵydaı Kóksý aýdany Aqtóbe aýylynyń mańynda ótkizdi. Qatysýshylardyń qadamyna sáttilik tilegen basqarma basshysy Baqytnur Baqytuly bul festıval óńirdegi ekologııalyq jáne taý týrızmin damytýǵa baǵyttalǵanyn atap ótti.
Bıikke shyǵar aldynda qatysýshylar ózderiniń hal-ahýaly úshin jaýapkershilik alatyny týraly mindetti qujatty, marshrýt barysyndaǵy jeke qaýipsizdik erejeleri men minez-qulyq qaýipsizdigi týraly nusqaýlyqty toltyryp, tirkeýden ótti. Munan soń fıtnes-jattyqtyrýshymen birge shaǵyn jattyǵý jasady.
Jalpy, marshrýttyń uzyndyǵy shamamen 13 km. «Visit Zhetysu» týrıstik-aqparattyq ortalyǵynyń basshysy Jandos Nurıev festıvaldiń basty maqsaty Jetisý oblysynda taý týrızmin nasıhattaý, múmkindiginshe kóp adamdy, ásirese jastardy salamatty belsendi demalysqa tartý ekenin atap ótti.
««Shagan Fest-2024» festıvalin ótkizý jaqsy dástúrge aınalýda. Bul joly jasy, kásibi men qyzyǵýshylyǵy san túrli 400-den astam qatysýshy Taldyqorǵan, Almaty, Tekeli qalalarynan, Saryózek aýylynan kelip otyr. «Bike Team», «VeloTravelTekeli», «VeloFriends» veloqoǵamdary, sondaı-aq «Jońǵarııa», «Istokı» balalar-jasóspirimder týrıstik klýbtary, «Atameken» fıtnes-ortalyǵynyń jattyqtyrýshylary, Taldyqorǵan joǵary polıtehnıkalyq kolledji men I.Jansúgirov atyndaǵy Jetisý ýnıversıtetiniń stýdentteri belsendilik kórsetti, ıaǵnı qatarymyzdyń kóbi jastar. Sonymen qatar bizde festıvalǵa ekinshi jyl qatarynan qatysyp otyrǵandar da bar, tipti búkil otbasymen kelgender de bar, biz buǵan qýanyshtymyz. Osylaısha, birte-birte «Shagan Fest» Jetisýdyń jaıaý jáne taý týrızminiń kórnekti sharasyna aınalyp keledi», deıdi J.Nurıev.
Taý shyńdaryn baǵyndyrýshylar úshin Taldyqorǵannan transfer uıymdastyryldy, sý, qorektik batondar, aıyrym bilezikteri taratyldy, marshrýttyń sońynda taza aýada keshki as berildi. Sonymen qatar taýǵa kóterilý men túsý kezinde uıymdastyrýshylar qaýipsizdikti qamtamasyz etip qana qoımaı, qajet bolǵan jaǵdaıda kómek kórsetý úshin marshrýtta motosıklder men arnaıy kólikter de júrdi. Atap ótsek, taýdan tómen túsken kezde qatysýshylar jol boıynda kezdesken turmystyq qoqystardy, negizinen plastıkalyq bótelkeler men polıetılen paketterdi jınady. Bul qoǵamdaǵy ekomádenıettiń nyǵaıyp kele jatqanyn kórsetse kerek.
Uıymdastyrýshylar bul sońǵy taý festıvali emes ekenin aıtady. Oblystyq kásipkerlik jáne ındýstrııalyq-ınnovasııalyq damý basqarmasynyń basshysy Baqytnur Baqytulynyń aıtýynsha, shilde aıynyń ekinshi jartysynda óńirde balalar men jasóspirimder týrızmin qoldaýǵa arnalǵan 2 iri is-shara ótkizý josparlanǵan.
«Uly dala eli» ekspedısııasyn jáne «Uly Jońǵar Alataýy» týrıadasyn ótkizemiz. Birinshisi – shaǵyn saıahat, ekinshisi – jarys. Marshrýttar qazir pysyqtalýda. Jetisý oblysynda taý týrızmin damytýdyń áleýeti zor ekenin eskere otyryp, osy baǵyttaǵy jumysty jalǵastyramyz. Týrızmniń bul baǵyty ásirese Sarqan, Eskeldi aýdandary men Tekeli qalasyna qatysty. Qora shatqalynda Ortalyq Azııadaǵy eń bıik Burhanbulaq sarqyramasy – basty kórikti jerlerimizdiń biri», deıdi B.Baqytuly.
Aıta keteıik, atalǵan festıval keler jyly da osy ýaqytta uıymdastyrylady.