«Ál-Jábrdiń atasy» jýrnaly ózbek tilinde jaryq kórdi

Basylym Ulttyq ǵylym akademııasynyń vıse-prezıdenti, akademık Asqar Jumadildaevtyń bastamasymen jaryqqa shyqqany belgili. Ǵylymı-tanymdyq  jýrnal  jarty jyldan beri qazaq tilinde turaqty shyǵyp keledi. Ár nómiri lıtıı, ǵarysh, robot sekildi mańyzdy ǵylymı taqyryptarǵa arnalǵan basylymǵa shetel oqyrmandary da qyzyǵýshylyq tanytyp, ózbek tilinde de basyp shyǵarý isi qolǵa alynǵan bolatyn.

«Ál-Jábr»  – algebra degen maǵynany bildiredi desek, onyń negizin qalaǵan Ál-Horezmı 1200 jyldaı buryn Aral teńizi mańynda ómir súrgen ǵulama. Ortalyq Azııa halyqtarynyń maqtanyshyna aınalǵan ǵalymnyń matematıka ǵylymyna engizgen termınderi búgingi tańda keńinen qoldanysta.  

«Bizdiń maqsat – uly babalarymyzdyń jolyn jalǵastyrý. Kezinde búkil álemniń damýyna ǵalamat úles qosqan eki ǵalym Ortalyq Azııadan shyqqan bolsa, sonyń biri – Ál-Horezmı. Ǵulamadan  «Algebra jáne algorıtm» degen eki sóz qalǵan. Qarapaıym telefon, teledıdar jáne tehnıkanyń ózge de túrleri áýeli algorıtmnen quralady. Meniń baıqaýymsha, oqý, bilim, ǵylym júıesi jáne minez-qulyq jaǵynan ózbek jáne qazaq jastary arasynda úlken uqsastyq bar. Sol sebepti «Ál-Jábrdiń atasyna» qyzyǵýshylyq úlken ekenin baıqadyq», deıdi akademık Asqar Jumadildaev.

Balalar men jalpy ǵylymsúıer oqyrmanǵa arnalǵan jýrnalda orta jáne joǵary synyp oqýshylarynyń tapsyrmasy «Taı jarysy», «Qunan jarysy» degen ataýmen berilgen. Jýrnaldyń ózbekshe nusqasy qazaq tilindegi jýrnalmen qatar jaryq kórip turatyn bolady.

О́zbekstan Ǵylym akademııasy jas ǵalymdar keńesi tóraǵasynyń orynbasary Gúlsanam Tıllaevanyń aıtýynsha, jýrnaldyń ózbek tilinde jaryq kórýi qazaq-ózbek ǵalymdary arasyndaǵy ózara yntymaqtastyq pen dostyqtyń jarqyn kórinisi. Aldaǵy ýaqytta jýrnaldyń mazmuny tereńdep, oqyrmanyn jańa bilimmen sýsyndata beretini anyq.

Jýrnaldyń shyǵýyna qoldaý kórsetken Qalan Edtech-kompanııasynyń negizin qalaýshylardyń biri Asqar Bolat atap ótkendeı, jýrnal ozyq ıdeıalar men jetistikterdi nasıhattaıtyn basylym retinde elimiz ǵana emes, matematıkaǵa qyzyǵýshylyq bildiretin barlyq Ortalyq Azııa balalaryn da yntalandyryp,  eki el arasyndaǵy ǵylymı baılanystyń, ǵylym men bilimniń damýyna yqpal etetin bolady.

ALMATY