Jańa ári jyldam qubylmaly ómir jaǵdaıynda árbir memlekettik organ bilimdi de bilikti, tyń serpiliske, ózgerýge daıyn ári jańa talap mejesinen kórine alatyn kásibı sheber memlekettik qyzmetshilerdi qajet etetini sózsiz.
Adam kóbine joǵary oqý ornyn támamdap, óz salasy boıynsha jumysqa ornalasqannan keıin oqýǵa degen yntasynyń «úzilis» tetigin basady. Qyzmetpen qatar, biliktiligin qatar shyńdap otyrý múmkin emes, bir kásipti bedeldi joǵary oqý ornynda oqyp, ıgerdim, sol jetkilikti degen qatqan qaǵıdaly azamattar da jetkilikti. Tipti kóp jylǵy tájirıbemen jınaqtalǵan kásibı sheberligiń) de qazirgi tańda jetistik deýge kelmeıdi. Sarapshylardyń «birneshe mamandyq joıylady nemese ózgeredi» degen boljamdary ýaqyt óte shyndyqqa aınalyp kele jatqanyn kóz kórip otyr.
Kreatıvti áleýetti damytýǵa, sandyq tehnologııalardy meńgerýge baǵyttalǵan bilimdi kúsheıtip, ýaqyt talaby men eńbek naryǵynyń qajettilikterine beıimdelý qajet. Jahandyq ózgerister aıasynda eńbek resýrstarynyń quzyrettiligi men biliktiligine qoıylatyn talaptar arta túsýde. Elimizdegi jappaı sıfrlandyrý baǵdarlamalary adam eńbegin barynsha almastyrýda. Málimetterdiń eskirýi men jańa aqparattardyń paıda bolý jyldamdyqtary artyp keledi.
Tez ózgermeli zamanda árbir memlekettik qyzmetshi básekege qabiletti jáne tıimdilikti ilgeriletýge múmkindik týǵyzatyn daǵdylar men quzyrettilikterdi ıgerýge baǵyttalǵan kásibı bilimin únemi shyńdap, jumysyn qalyptasqan bir saryndy tempten góri jańa ınnovasııalyq tehnologııalarmen yqpaldastyrsa, eńbegi baǵaly bolary haq. Bul óz kezeginde tıimdi memlekettik apparatty qurýǵa yqpal etedi.
Jańa formasııadaǵy memlekettik qyzmetshi – týyndaǵan máselelerdi jedel sheshe alatyn, jańa sharttarǵa jyldam beıimdelgish, únemi ózgerýge daıyn qabiletke ıe tulǵa. Memleket basshysy Prezıdenttik jastar kadr rezerviniń forýmynda sóılegen sózinde memleket basqarý isine oıy ushqyr, bilimi ozyq, sana-sezimi tereń, naǵyz otanshyl azamattar kóptep kelýi kerektigin basa aıtty. Memlekettik qyzmetshilerdi quzyrettilik yńǵaıyna oraı daıarlaý, oqytý memlekettik apparatty kásibılendirýdi jetildirýge jeteleıtin álemdik trendterdiń biri. Oqytýdyń nátıjeliligi – qyzmetker jumysynyń tıimdiligi kórsetkishterine oń áser beretin oqytý úderisiniń ajyramas sharty.
2023 jyly Astana qalasynyń jergilikti memlekettik organdarynda jumys atqarǵan 969 memlekettik qyzmetshiniń 311-i (onyń ishinde 74 -qaıta daıarlaý, 237 – biliktiligin arttyrý) zamanaýı memlekettik qyzmetshilerge qajetti quzyretter men daǵdylardy damytýǵa baǵyttalǵan kýrstar men semınarlardan ótti.
«B» korpýsy memlekettik ákimshilik qyzmetshileriniń qyzmetin baǵalaýdyń úlgilik ádistemesiniń 10-tarmaǵynda, 360 ádisi boıynsha baǵalaý nátıjeleri qyzmetshini oqytý boıynsha sheshimder qabyldaý úshin negiz bolady delingen. Osy turǵyda memlekettik qyzmetshilerdi jalpy tendensııa jetegine ergizbeı, baǵalaý nátıjesinde anyqtalǵan kemshin tustaryn arttyrýǵa baǵyttalǵan taqyryptyq semınarlarǵa jiberý arqyly jumys kúshiniń ónimdiligine jańa serpin berý qajet. Búgingi oqytý – memlekettik qyzmetshilerdiń budan ári satylap ósýi úshin qýatty yntalandyrý.
Aqıqatyna kelsek, memlekettik qyzmetshilerdiń ınformaldy (ózdiginen bilim alý) bilimin jetildirýge ýaqyty da bola bermeıdi. Árbir sekýnd tapshy zamanda memlekettik qyzmetshilerdiń óz betinshe, yńǵaıly ýaqytta, biliktilikteri men daǵdylaryn damytýǵa arnalǵan onlaın kýrsta, vebınarlar, onlaın platformalar ınternet jelisinde jetip artylady.
Sonyń biri – kásibı jáne jeke damý týraly materıaldardy usyna otyryp, memlekettik qyzmetshiler úshin tıimdi jáne sapaly bilim usyný maqsatynda ashylǵan «Lifelong learning|APA KZ» telegram-arnasy. Ol Prezıdent janyndaǵy Memlekettik basqarý akademııasynyń «Memlekettik qyzmetshilerdi úzdiksiz oqytý júıesin engizý» jobasyn nasıhattaıdy. Arna tórt negizgi bloktan turady: #kitaptar, #maqalalar, #quzyrettilik_vıdeolary jáne #ózin_ózi_kútý (densaýlyq kútý, jattyǵý jasaıtyn beınerolıkter jáne t.b.). Kásibı daǵdylardy damytatyn jáne jumys tıimdiligin arttyratyn qyzyqty ári paıdaly aqparattar jarııalanady.
Memlekettik qyzmetshilerdi oqytý júıesindegi bas oqý orny, memlekettik qyzmetti oqytý uıymynyń dińgegi bolyp sanalatyn Akademııada memlekettik qyzmetshilerdi daıarlaý 8 magıstratýra baǵdarlamasy jáne 3 doktorantýra baǵdarlamasy boıynsha júzege asyrylyp jatyr.
2024-2025 oqý jylyna qujat qabyldaý onlaın formatta Akademııanyń arnaıy aqparattyq júıesi arqyly 26 maýsymǵa deıin qabyldanǵanyn aıta ketken jón. Sondaı-aq Eńbek jáne halyqty áleýmettik qorǵaý mınıstrliginiń Eńbek resýrstaryn damytý ortalyǵynyń derekteri boıynsha 2021 jyldyń 1 shildesinen bastap skills.enbek.kz qysqamerzimdi onlaın kýrstarǵa (23 kásibı sala, 142 kásipti qamtyǵan) oqytý platformasy iske qosylǵan. Resýrs bilimdilik pen kásipqoılyq deńgeıin arttyrý, mansaptyq órleýdi yntalandyrý jáne «ómir boıy oqý» qaǵıdatyn ilgeriletý, onlaın oqytý naryǵyn damytý boıynsha jaǵdaı jasaý úshin qurylǵan. Sondyqtan, memlekettik qyzmet, ıaǵnı halyqqa qyzmet etý jolyn tańdaǵan azamattar osyndaı múmkindikterdi jiberip almaı, bilimin udaıy jetildirip otyrýǵa kóńil de, ýaqyt ta taba bilse, nur ústine nur. Jańa bilim men biliktilik memlekettik basqarýdyń jańa kókjıekterin ashatyny sózsiz.
Mereı RAZAQ,
Memlekettik qyzmet isteri agenttigi Astana qalasy boıynsha departamentiniń bas mamany