Samat Musabaev bastaǵan QR Parlamenti Májilisiniń bir top depýtaty Bas prokýror Berik Asylov pen Ulttyq qaýipsizdik komıtetiniń tóraǵasy Ermek Saǵymbaevqa depýtattyq saýal joldap, áleýmettik jelilerde halqymyzdyń ulttyq mádenıetine nuqsan keltiretin, qoǵamda teris aǵymdardy nasıhattaıtyn aqparat kózderinen saqtaıtyn zań normalaryn ázirleýdi usyndy, dep jazady Egemen.kz.
Depýtattyń aıtýynsha, áleýmettik jelilerde qazaqtyń ulttyq qundylyqtaryna aqparattyq shabýyl jasalyp jatyr.
«Babadan qalǵan eń qasterli muramyzdyń biri – kıiz úı edi. San ǵasyr boıy handarymyzǵa eńsesi bıik aq orda, halqymyzǵa qut uıalaǵan baspana bolǵan sol kıiz úıge jáne basqa da qundylyqtarymyzǵa aqparattyq shabýyl da bastaldy. Kúni keshe oıýlaǵan kıiz úıde ulttyq kıim kıip, jartylaı jalańashtanyp oıqastaǵan úsheýdiń áleýmettik jelini sharlaǵan beınerolıgi qazaqtyń ashý-yzasyn týdyryp otyr. Halyqtyń buǵan narazylyǵy ábden oryndy. Eń aıaýly dúnıeńdi aıaqqa taptasa, ulttyq kıimmen jalańashtansa, tórińde áýretin ashyp taırańdasa – bul búkil ultty, deni qazaq, rýhy bıik elimizdi qorlaýmen para-par. Eń soraqysy – álgi jyn-oınaqtaǵy úsh uzynnyń ortadaǵy «sıraqty prımasy» ez eken», deıdi ol depýtattyq saýalynda.
Samat Musabaev atap ótkendeı, bul – halqymyzǵa qarsy mysyq tileýli, teris nıettilerdiń aldyn ala jete oılastyryp, qazaqy dúnıeni, ulttyq qundylyqtardy qunsyzdandyrýǵa, mazaq etýge baǵyttalǵan qasaqana jaýlyq áreketi.
«Tal túste tórimizde taırańdaǵany – naǵyz basynǵandyq. Olar búgin tórimizde taırańdasa, erteń tóbemizde oınamasyna kim kepil?! Sondyqtan buǵan kóz jumyp qarap, jaı qaldyra salýǵa bolmaıdy. «Albasty qabaqqa qarap basady» degen. Bul birinshiden, qoǵamnyń osy áreketke qalaı ún qatatynyn baıqaıyn degen astyrtyn syr tartý tásili bolsa, ekinshiden, LGBT nasıhatyna tosqaýyl qoımaq talapqa degen ashyq qarsylyq, úshinshiden, óskeleń býyndy óz ulttyq qundylyqtarynan jerindirý áreketi», dep tolyqtyrdy depýtat.
Onyń aıtýynsha, bul másele ótken jyly da Májilis minberinen kóterilip, barlyq platformalarda, áleýmettik jelilerde ulttyq mádenıetke sáıkes kelmeıtin aqparattyq ónimderdi taratýǵa tyıym salýǵa, teris aǵymdardy nasıhattaıtyn aqparat kózderinen saqtaıtyn zań normalaryn ázirleý usynylǵan edi.
Aıta keteıik, taıaýda qoǵam belsendileri LGBT nasıhatyna qarsy petısııa jarııalaǵan. Nebári 2 apta ishinde petısııany 50 myń adam qoldady.
«Alda ótetin petısııa qorytyndysyn qaraý otyrysyna qoǵam belsendilerin, ult janashyrlaryn belsene qatysýǵa shaqyramyn. Beınerolıktegi ulttyq qundylyqtarymyzdy qorlaý kórinisi – ábden shekten shyqqandyq. Sondyqtan quqyq qorǵaý organdary osy másele boıynsha naqty quqyqtyq baǵasyn berýi tıis. Budan bylaı ulttyq qundylyqtarymyz – dombyra, qobyz, kıiz úı, ulttyq kıim, ulttyq taǵam sekildi asyl jádigerlerimizdi qandaı-da teris maqsatta paıdalaný, mazaq etý – ult namysyna qol suǵý, ulttyń bedelin túsirýge baǵyttalǵan qylmystyq áreket dep baǵalanyp, qylmystyq jaýaptylyqpen jazalanýy tıis», dep túıindedi depýtat.
Osy oraıda Samat Musabaev atalǵan beınerolık boıynsha quqyqtyq baǵa berilip, oǵan qatysty naqty shara qoldanýdy surady.