Qazaqstannyń Syrtqy ister mınıstrligi Grekııanyń Gıdra aralyndaǵy ormandy órteý oqıǵasyna qatysty pikir bildirdi, dep habarlaıdy Egemen.kz.
Syrtqy ister mınıstrliginiń resmı ókili Aıbek Smadııarovtyń aıtýynsha, Qazaqstan konsýly bul oqıǵaǵa BAQ-ta jarııalanǵannan keıin birden jaýap bergen.
«Bul aqparat jarııalanǵannan keıin Qazaqstan konsýly osy oqıǵa boıynsha Grekııa bıligine habarlasty. Polısııa ustalǵandar arasynda Qazaqstan azamattary joq ekenin jáne olarǵa eshqandaı shaǵym túspegenin habarlady», dedi A.Smadııarov.
Esterińizge sala keteıik, buǵan deıin Grekııa buqaralyq aqparat quraldary Qazaqstannan kelgen týrıster Grekııanyń Gıdra aralynda orman órtin shyǵarǵanyn habarlaǵan edi.
Maýsymnyń 21-i kúni keshke demalýshylar jalǵa alǵan ıahtadan otshashý uıymdastyrǵan. Saldarynan qaraǵaıly ormanda órt tutanǵan. О́rtti sóndirýge órt sóndirýshiler men eriktiler qatysty. Oǵan tikushaq ta tartyldy.
Buqaralyq aqparat quraldarynyń habarlaýynsha, Gıdra meri Djorgos Koýkýdakıs ákimshilik órtti týdyrǵan sheteldikterdi sotqa bermek nıette ekenin aıtty. О́rt kezinde kemede bolǵandardyń barlyǵy, onyń ishinde ekıpaj músheleri de ustaldy.