Izdenýshi adamnyń jany aǵyndy bulaq ispetti. Únemi ózin-ózi shaıyp, aǵystan-aǵysqa almasyp otyrady. Psıholog Zıgmýnd Freıd aıtqandaı, adam – qalyptasyp bitpeıtin jaratylys. Kemeldenýdiń sheti men shegi joq. Áljýaz degen jan áýlıege, áperbaqan dep júrgenimiz áıgili ártiske aınalyp ketýi áp-sátte.
2010 jyldyń jaz mezgili edi. Onynshy synypty bitirgen órim kezim. Alqapta qarbyz artyp júrgenimizde, kenet eki aýylas aǵam shekisip qalyp: «Men sen sekildi áli kúnge dop qýyp júrgen joqpyn!» dedi biri, ekinshisi: «dop qýsam da upaıym túgel, men túbi senen ozamyn!» dedi julyp alǵandaı.
– Kel básteseıik, 4 jyldan keıin kimniń ozaryn kóreıik, sonda kórersiń kimniń kim ekenin,–dep ekeýi qol alysty.
Sol ýaqyttan beri tórt jyl da qas qaqqandaı óte shyqty. Ekeýiniń de jasy jıyrma besten asyp jyǵylǵan edi. Biraq ne ózgergen, ne tyndyrǵan túgi de joq. Sol baıaǵy qarasha aýyl mańy, súıkimsiz myjyraıǵan úıler, batpaqqa belshesinen batqan esik aldyndaǵy arba, aqjemtir bolyp ketken shatyrlar... Birde aýylda birin kezdestirip qalyp: «Osydan tórt jyl burynǵy básteskeniń esińde me?» dedim jaqyn kelip. Álgi jigitim jarqyraı kúlip «qandaı bástesý, sen de júrgen qııalsyń» dedi de qoıdy.
Meniń bilgim kelgeni, adamdar rasynda ózgere ala ma? Nemese taǵdyrmen soqyrteke oınap júrip oqystan súrinip qalyp, babasynyń babasy jasaǵan qatelikti qaıtalap «adamdyq qoqysyna» tastala ma? Bala kúnimde bir kisini Áýlıe dep oılaıtynmyn. Bir kúni kóshede qulap jatqanyn kórip «Áýlıe bolsa nege qulaıdy?» dep uzaq oılanǵanym esimde.
Eınshteın: «О́mir – velosıped aıdaý sııaqty, tepe-teńdikti saqtaý úshin árdaıym qımyldaý kerek» degen eken. Iá, ómir soqpaǵynda baǵytyńnan jańylyp baz keshý ońaı. Baǵyńdy kúzetip, bultqa jeter jolǵa shyǵý úshin únemi óz-ózińdi tarazylaý, esep berý lázim. Solaısha únemi jaqsy tusqa ózgerip, qudiretti adamǵa aınalýǵa bolady.