Memleket basshysy Qasym-Jomart Toqaev otandyq BAQ salasy qyzmetkerlerimen júzdesti, dep habarlaıdy Egemen.kz Aqordanyń baspasóz qyzmetine silteme jasap.
«Jalpy, depýtat pen jýrnalıst qyzmeti bir-birimen tyǵyz baılanysyp jatyr. Ekeýi de el múddesin qorǵaıdy. Halyq senimin arqalap, oǵan múltiksiz qyzmet etedi. Qazir depýtattar korpýsy men mass-medıa ókilderi úılesimdi jumys istep jatyr», dedi Prezıdent.
Memleket basshysynyń aıtýynsha, jýrnalıster qaýymy ulttyq parlamentarızmdi damytýǵa qashanda zor úles qosyp keledi.
«Qazirgi depýtattar quramynda aqparat salasynyń ókilderi jetkilikti. Atap aıtqanda, Nurtóre Júsip, Ermurat Bapı, Qazybek Isa, Sergeı Ponomarev, Janarbek Áshimjan, Bıbigúl Jeksenbaı, Aıgúl Qapbarova sekildi áriptesterińiz kópshilikke belgili. Ult múddesin qorǵap júrgen jýrnalısterdiń Parlament tórinde otyrýy – zańdylyq.
Sonymen qatar Prezıdent Ákimshiliginde de áriptesterińiz az emes. Olar óz kásibı ortasyna qoldaý bildirip, buqaralyq aqparat quraldary men memlekettik organdar arasynda altyn kópir qyzmetin atqarady», dedi el Prezıdenti.