Statıstıka obektıvti jáne senimdi bolýy kerek. Bul – barlyq kórsetkishke qatysty másele, onyń ishinde adamdardyń ómir súrý deńgeıine qatysty málimetter úshin asa mańyzdy. Bul týraly Senat Tóraǵasy Máýlen Áshimbaev búgingi Palata otyrysynda aıtty, dep habarlaıdy Egemen.kz Senattyń baspasóz qyzmetine silteme jasap.
«Tıimdi qadamdar jasap, qajetti zańdar qabyldaý úshin bizge oblystarda, óńirlerde ne bolyp jatqany jóninde obektıvti ári naqty derekter qajet. Negizgi statıstıkalyq málimetter jergilikti atqarýshy organdardyń qatysýymen jáne úılestirýimen qalyptasatyny belgili. Olar úshin bul, bir jaǵynan, joǵary turǵan qurylymdarǵa qandaı da bir esep berý ekeni túsinikti. Osy rette keıbir jaǵdaıda manıpýlıasııaǵa jol beriletinin teriske shyǵarýǵa bolmaıdy. Memleket basshysynyń tapsyrmasymen júzege asyrylatyn jumystar barynsha nátıjeli bolýy úshin ınflıasııa, halyqtyń tabysy, ekonomıkalyq ósý, belgili bir salalar men óńirlerdegi jaǵdaı boıynsha obektıvti statıstıka qajet. Sol sebepti atalǵan másele óte mańyzdy jáne zańǵa balamaly aqparat kózderi boıynsha normalardyń engizilýi durys tásil», dedi Senat Tóraǵasy.
Osyǵan oraı Máýlen Áshimbaev jergilikti jerlerde statıstıkalyq málimetter qalaı qalyptasatynyn jáne balamaly aqparat kózderi qanshalyqty qoldanylatynyn qadaǵalaý úshin Statıstıka bıýrosymen birlesip, óńirlerde Senattyń salalyq komıtetiniń kóshpeli otyrysyn ótkizýdi usyndy. Sondaı-aq qazirgi tańdaǵy Big Data jáne basqa da derek kózderin qoldana otyryp, statıstıkalyq massıvti tıimdi taldaý tásilderin zerdeleýdiń mańyzdy ekeni sóz boldy.
Aıta ketsek, búgin Palata otyrysynda senatorlar «QR-nyń keıbir zańnamalyq aktilerine memlekettik baqylaý men statıstıka, halyqty qorǵaý júıesin jetildirý, derekterdi basqarý, zańdy tulǵalardy tirkeý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańdy qarady.