«Egemenniń» eldegi tilshileri shetinen elgezek. Jarǵaq qulaǵy jastyqqa tımeı, óz óńirlerindegi ózekti jańalyqtardy jedeldetip jalpaq jurtqa jetkizýge asyǵady. Áriptesterimiz, árıne, ártúrli taqyrypta qalam terbeıdi. Áıtse de olardyń árqaısynyń oń jambasyna keletin, kelistirip jazatyn dúnıeleri bolady.
Máselen, Batys Qazaqstan oblysyndaǵy qalamdasymyz Qazbek Quttymuratuly kóne tarıhtyń kómbesin aqtarýǵa qumar. Jaıylyp aqqan Jaıyqtyń arǵy-bergi betinde ol kórmegen oı-shuqyr kemde-kem. Arasynda anaý Mańǵystaýdaǵy Svetqalı Nurjan aǵasy sekildi en dalany erkin kezip, eski molalardaǵy qum basqan qulpytastardaǵy qupııa jazýlardy oqıtyn «oǵashtaý» ádeti taǵy bar. El jadynan shyǵyp, eskerýsiz qalǵan erek tulǵalardyń talaıyn qaıta tiriltti.
Byltyr kúzde issaparmen Oralǵa barǵanymyzda, esti sózge úıir Erbolat Qamen inim ekeýmizdi qasıetti Narynnyń qalyń qumyn qaq jaryp Bókeı ordasyndaǵy Jáńgir babamyzdyń basyna aparǵany, Jasqustaǵy «aınalasy aıshylyq, kóldeneńi kúnshilik», «alpys bólme júz esik» han saraıyn aralaǵan sáýleli sátter sirá, esten keter me? Batys alashordanyń baıraǵyn jelbiretken Jympıty jerindegi jyly júzdesýler de umytyla qoımasy anyq. Jol boıy el, jer, tulpar minip, tý ustaǵan erler haqynda aıtqan aǵyl-tegil áńgimesi de jadymyzda áli jańǵyryp tur.
Keshe redaksııamyzǵa qýanyshty habar jetti. Qalamymen rýhanııat kenin qazyp júrgen Qazbek Quttymuratuly oblys ákimdiginiń usynýymen «Qurmet» ordenimen marapattalypty. Bul bıyl «Egemen» enshisine tıgen ekinshi «Qurmet». Birinshisin Prezıdent qolynan – osy Qazbektiń QazMUÝ-da birge oqyǵan kýrstasy Aıúl Ahanbaıqyzy aldy.
Endeshe, eki áriptesimizdiń de jazary kóbeıip, qalamynyń sııasy keppesin!