Tarazda aǵa prokýror Sergeı Nalygachev kóz jumdy. Qaıǵyly oqıǵa jergilikti dámhanalardyń birinde bolǵan, dep habarlaıdy Egemen.kz.
Qaıǵyly oqıǵa 2024 jyldyń 30 maýsymynda bolǵan, biraq bul týraly aqparat 10 shildede taraı bastaǵan. Prokýror qaıtys bolǵan dámhananyń ákimshiligi oqıǵanyń egjeı-tegjeıin baıandady.
Sol kúni Nalygachev dámhanaǵa dosymen birge barǵan edi. Olar asqa tapsyrys bergen, biraq oqıǵa daıashy nan salynǵan ydysty ákelgennen keıin bolǵan.
Dosynyń aıtýynsha, aǵa prokýror nanǵa qaqalyp qalǵan. Oǵan qosa er adam oqıǵaǵa deıin 1-2 kún buryn ınsýltpen aýrýhanaǵa túskeni anyqtaldy. Biraq tıisti em sharalaryn qabyldamaı, aýrýhanadan shyǵyp ketkendi jón kórgen.
Dámhana ákimshiligi prokýrordyń dosy alǵashqy medısınalyq kómek kórsete almaǵanyn alǵa tartyp otyr. Er adam jedel járdem brıgadasy kelgenge deıin jan tapsyrǵan.
Aıta keteıik, Sergeı Nalygachev 20 jyldan astam ýaqyt boıy Jambyl oblysynyń prokýratýrasynda qyzmet etken.
«Ol ujym arasynda úlken qurmetke ıe boldy», deıdi marqumnyń áriptesteri.
Jambyl oblysynyń prokýratýrasy Sergeı Nalygachevtyń otbasy men jaqyndaryna kóńil aıtyp, moraldyq jáne materıaldyq qoldaý kórsetýge ýáde berdi.