13 shildede Madrıdte ánshi Dımash Qudaıbergenniń jankúıerleriniń kezdesýi ótti. Is-shara Ulttyq dombyra kúnine arnalyp, Ispanııanyń túkpir-túkpirinen, sondaı-aq Germanııa men Shveısarııadan kelgen jankúıerlerdiń basyn qosqan, dep habarlaıdy Egemen.kz dimashnews.com saıtyna silteme jasap.
Is-sharaǵa Qazaqstannyń Ispanııadaǵy elshiliginiń ókilderi, atap aıtqanda, elshi Danat Musaev, birinshi hatshy Qýanysh Ábpasov, Mádenıet jáne týrızm basqarmasynyń basshysy Raıymbek Toqtaýbaev qatysqan.
Ispandyq jankúıerlerge qazaq tilinen onlaın sabaq berip júrgen professor Sandý Toqtaýbaeva da qatysýshylardyń ystyq yqylasyna bólengen.
Dombyra kúnin atap ótý úshin Qazaqstan elshiligi merekelik konsert uıymdastyrǵan. Onda balalar dástúrli aspapta ár túrli shyǵarmalardy oryndaǵan. Alınur men Álıhan Amangeldi jáne Dáýlet Ismaılov óz ónerlerin ortaǵa salyp, qazaq mýzykasynyń rýhyn jetkizdi.
Ispanııadaǵy qazaq dıasporasynyń ókili Gúlnár Gúlcha qonaqtardy qazaqtyń ulttyq taǵamdarynan dám tatqyzyp, ulttyq naqyshtaǵy kıimderin tanystyrǵan.
Sonymen qatar is-sharaǵa Dımashqa arnalǵan týyndylaryn usynǵan fan-art sýretshisi Hose Býson, Baqytty Bala 2023 jeńimpazy Lıýsııa Kasanı jáne La Voz Kids 2023 fınalısi Jalen Alı syndy arnaıy qonaqtar qatysqan.
Dımash Qudaıbergenniń jankúıerleriniń Madrıdtegi kezdesýi tek mýzyka merekesi ǵana emes, mádenıetter birliginiń sımvolyna aınaldy desek te bolady.