16 shilde kúni «Qazaqstan halqyna» qory elimizde onkologııalyq naýqastarǵa beriletin tegin dáriniń 15-ten 6-ǵa deıin qysqarýyna baılanysty másele kótergen edi. Densaýlyq saqtaý mınıstrligi qordyń synyna jaýap berdi, dep jazady Egemen.kz.
Mınıstrlik atalǵan dertke shaldyqqandardyń eshbiri qajetti emsiz qalmaıtynyn málimdedi.
«Onkologııalyq jáne onkogematologııalyq aýrýlarmen aýyratyn pasıentterdi dárilik preparattarmen qamtamasyz etý Densaýlyq saqtaý mınıstrliginiń basymdyǵy. Dári-dármekterdi jetkizýdegi kez-kelgen úzilisterdi boldyrmaý úshin vedomstvo dári-dármekterdi ýaqtyly berý tetigin anyqtady. Oblystyq densaýlyq saqtaý basqarmalary men onkologııalyq ortalyqtar jaǵdaıǵa monıtorıng júrgizedi», delingen mınıstrlik málimdemesinde.
Al pasıentter qajetti keńes pen dári-dármekke ótinish, onyń sapasyna qatysty oı-pikirin 8 (7172) 570 950 nomeri arqyly jetkize alady.