Soltústik Qazaqstan ýnıversıtetiniń kolledji jabylýy múmkin. Osyǵan baılanysty 300-den astam stýdent dıplomsyz qalýy múmkin, dep habarlaıdy Egemen.kz.
Kolledj quryltaıshylary bilim ordasy jańa oqý jyly qarsańynda jabylatynyn málimdegen.
«Dúısenbi kúni jetekshiler muǵalimderdi jınap, bul jańalyqty aıtty. Kýratorlar bizge hat jazyp qoıǵan edi. Bul qalaı bolady? Bireýge bir jyl, endi birine eki jyl oqý qaldy. Olardyń aıtýynsha, biz basqa kolledjge aýysa alamyz. Biraq men «aýdarma isi» mamandyǵy boıynsha oqımyn jáne bul mamandyq tek osy kolledjde ǵana bar. Úsh jyldyq oqýymnyń bir jyly ǵana qalǵan edi. Budan ári ne isteıtinimdi bilmeımin», dedi kolledj stýdenti Iаroslav Dýbrovın.
Taǵy bir stýdent Ádil Asylbekov ótken jyly zańger mamandyǵy boıynsha oqýǵa túsken.
«Maǵan munda oqyǵan unaıdy. Kolledjdiń jabylýyna qarsymyn, oqýymdy aıaqtaǵym keledi», deıdi stýdent.
Aıta keteıik, kolledjdiń jabylýy týraly aqparat áleýmettik jelilerde paıda bolǵan.
Stýdentter men olardyń ata-analary basqa oqý oryndaryna aýysa almaıtynyn jetkizdi, sebebi qabyldaý komıssııalary óz jumysyn aıaqtap qoıǵan. Ashynǵan ata-analar jaǵdaıdy retteý úshin kolledj ǵımaratyna barǵan.
Kolledj dırektorynyń mindetin atqarýshy Bolat Baıkenovtyń aıtýynsha, qazir oqý ornynda 310 stýdent bilim alady, biraq kommersııalyq toptar óte az. Stýdentterdiń 80 paıyzy bıýdjettik negizde oqıdy, al bul quryltaıshylarǵa tabys ákelmeıdi.