Bıyl Atyraýdaǵy Ulttyq quryltaıda sóz etilgen 5 zań qabyldandy. Bulardyń ishinde áıel quqyǵy men bala qaýipsizdigi, esirtki men veıp saýdasy jáne onomastıka men geraldıka jónindegi zańdar bar. Mine, taıaýda Memleket basshysy Qasym-Jomart Toqaev «Oıyn bıznesi, lotereıa qyzmeti, densaýlyq saqtaý, memlekettik eńbek ınspeksııasy, memlekettik baqylaý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańyna qol qoıdy.
Prezıdent lýlomanııany basty áleýmettik máselelerdiń biri dep atady. «Keıbir málimetterge qarasaq, 400 myńǵa jýyq azamat – býkmekerlik keńseler men kazınolardyń turaqty klıenti. Bul – tutas bir qalanyń halyq sanyna para-par kórsetkish», deı kele Memleket basshysy azamattardyń jekelegen sanattary úshin qumar oıyndarǵa qatysty shekteý qoıý jumysyn kúsheıtýdi qajet ekenin qadap aıtty.
«Amanat» partııasy fraksııasynyń bastamasymen osy másele boıynsha tıisti zań jobasy ázirlendi. Parlamentte qaralyp jatqan sol jobany osy sessııanyń sońyna deıin qabyldaý qajet. Biz jastardyń qumar oıynǵa salynyp, arzan tabysqa umtylýyna jol bermeýimiz kerek. Adal eńbekpen tapqan tabys qana berekeli bolady», dedi Qasym-Jomart Toqaev.
Parlament oıyn bıznesi, lotereıa jáne lotereıa qyzmeti máseleleri boıynsha zańnamalyq túzetýlerdi, onyń ishinde, Ákimshilik quqyq buzýshylyq týraly kodekske túzetýlerdi qabyldady. Úkimet zańsyz oıyn bıznesine jáne lýdomanııaǵa qarsy kúrestiń 2024-2026 jyldarǵa arnalǵan keshendi josparyn engizdi.
Zań arqyly halyqtyń oıynǵa táýeldiligin tómendetýge baǵyttalǵan shekteýshi jáne yntalandyrýshy normalar engizildi. Endi memlekettik qyzmetkerlerge qumar oıyndardyń kez kelgen qyzmeti – býkmekerlik keńseler, kazınolar jáne onlaın kazınolar shekteledi. Jalpy sany 280 myńǵa jýyq adamdy quraıtyn áskerı qyzmetkerler, memlekettik mekeme qyzmetkerleri, bıýdjettik uıymdardyń basshylary qumar oıyndarǵa qatysa almaıdy. Qumar oıyndarǵa táýeldi adamdardy medısınalyq ońaltý tártibi de anyqtalǵan.
Zańnyń mańyzdy jańalyqtarynyń biri – 21 jasqa tolmaǵan tulǵalarǵa energetıkalyq sýsyndardy satýǵa tyıym salý. Zań baılanys operatorlaryna qumar oıyndar men bás tigýge arnalǵan jarnamany qamtıtyn habarlamalardy jiberýge tyıym salady.
Býkmekerlik keńseniń ornalasqan jerinde, ǵımarattarda, kólik quraldarynda býkmekerlik keńseler ǵımarattarynyń syrtqy jarnamasyna, býkmekerlik keńselerdi buqaralyq aqparat quraldarynda, kıno, beıne jáne anyqtamalyq qyzmetterde jarnamalaýǵa tyıym salynady. Býkmekerlik keńselerdiń jarnamasyn taratqan jaǵdaıda 60 AEK jáne odan joǵary aıyppuldar qarastyrylǵan.
Onlaın-kazıno uıymdastyrýshylary eki jylǵa deıin bas bostandyǵynan aıyrylýmen baılanysty qylmystyq jaýapkershilikke tartylý qaýpi bar. Budan ózge ózgerister men tolyqtyrýlar engizilgen zańǵa sáıkes endi elektrondy lotereıa bıletteri tek resmı ınternet-resýrs nemese lotereıa operatorynyń mobıldi qosymshasy arqyly satylady. «Lotomatic» termınaldary men loto klýbtarynyń qyzmetine tyıym salyndy.
Lotereıa bıletterin turǵyn úılerde, jataqhanalarda, uıymdarda, bilim berý, densaýlyq saqtaý, dinı ǵımarattary men qurylystarynda, bilim berý jáne densaýlyq saqtaý uıymdarynan júz metr radıýsta taratýǵa tyıym salynady. Bul da bitken úlken bir jumys ári jeńis. Sebebi dál osy zańǵa qarsy bolǵan nebir lobbıstik toptar boldy.
Dáýlet Muqaev,Májilis depýtaty