Abaı oblysy Maqanshy aýdanynyń aýrýhanasynda naýqastarǵa jaramdylyq merzimi ótip ketken anestezııa preparattary salynǵan, dep habarlaıdy Egemen.kz.
Maqanshy aýdanynyń prokýratýrasy densaýlyq saqtaý mekemesin tekserý barysynda dári-dármekpen qamtamasyz etý boıynsha zań buzýshylyqtardy anyqtaǵan.
Tekseris nátıjesinde dári-dármektiń durys saqtalmaýy, esirtki zattary bar ampýlalardyń ýaqtyly joıylmaýy jáne dári-dármekterdiń durys taǵaıyndalmaýy anyqtalǵan.
Sonymen qatar naýqastarǵa ota jasaý kezinde merzimi ótip ketken «Ketam» anestezııa (narkoz) preparatyn qoldaný faktileri anyqtalǵan.
«Prokýratýra qabyldaǵan sharalardyń nátıjesinde medısınalyq mekemeniń 12 qyzmetkeri tártiptik jazaǵa tartylyp, 12 tulǵaǵa QR ÁQBtK-niń 426-baby (farmasevtıkalyq qyzmettiń jáne dárilik zattar men medısınalyq buıymdardyń aınalysy salasynyń qaǵıdalaryn buzý) boıynsha 1,5 mln teńgeden astam ákimshilik aıyppul salyndy», dep habarlady oblystyq prokýratýranyń baspasóz qyzmeti.