Parıj Olımpıadasyndaǵy alǵashqy kezdesýlerinde erler sapynan úsh boksshy alǵashqy aınalymda-aq jeńildi. Olar: 71 kelide Aslanbek Shymbergenov, +92 keli salmaq dárejesinde Qamshybek Qońqabaev jáne 57 kelide Mahmud Sabyrhan. Osy sátsizdikke qatysty 2008 jyly Pekınde ótken Olımpıadada 69 kelide chempıon atanyp, altyn medal taǵynǵan Baqyt Sársekbaev pikir bildirdi, dep jazady Egemen.kz.
Baqyt Sársekbaev el úmit artqan boksshylardyń birinshi kezdesýden asa almaǵanyn synǵa aldy. Ol osy máselege qatysty oıyn Feısbýk paraqshasynda jarııalady.
«Jigitterdiń fızıkasy óte nashar! Ekinshi raýndta dem alystary qıyndap, áreń júr rıngte. Soqqylary az. Soqqylar kombınasııasy tipti az. 3 mınýtta qansha soqqy jaýdyrýǵa bolady?! Fızıkasymen aınalysýǵa arnaıy shaqyrtylǵan kýbalyq maman qaıda qarap júr? Tutas ǵylymı top qaıda? Nege bizdiń boksshylardyń demi jetpeı júr? Úsh raýnd aıaqta tura almaıdy. Ne istep júrsińder shubyryp báriń? Birinshi básekeden óte almady degen ne sumdyq? Bir suraq: árbir boksshy lısenzııa alǵannan Olımpıadaǵa deıin neshe jekpe-jek ótkizdi? Tájirıbe bar ma? Mysaly, men jarty jylda 22 jekpe-jek ótkizdim. Bas bapkerge aıtatyn sózim joq tipti...», dep jazdy B.Sársekbaev. Eske salaıyq, B. Sársekbaev 2008 jyly ótken tórtjyldyqtyń basty básekesiniń fınalynda kýbalyq azýly qarsylas Karlos Banter Sýarresti 18:9 esebimen jeńip, Qazaqstan qorjynyna altyn medal salǵan edi.