Mádenıet jáne aqparat mınıstri Aıda Balaeva bıyl 10 maýsymda LGBT-ny ashyq jáne jasyryn túrde nasıhattaýǵa tolyq tyıym salý týraly mınıstrlikke kelip túsken ótinishke qatysty pikirin bildirdi.
Bıyl «E-Petition.kz» resmı portalynda «Biz Qazaqstandaǵy LGBT-ny ashyq jáne jasyryn nasıhattaýǵa qarsymyz» petısııasy jarııalanyp, 9 maýsymda ol resmı qaralýy úshin qajetti 50 myń qoldy jınaǵan edi. Ákimshilik rásimdik-prosesstik kodekstiń 90-5-babyna sáıkes petısııany qaraý merzimi – ony tirkegen sátten bastap 40 jumys kúnine deıingi ýaqyt aralyǵyn qamtıdy. Osyǵan oraı Mádenıet jáne aqparat mınıstrligi múddeli taraptardyń, memlekettik organdar men qoǵamdyq birlestikter ókilderinen quralǵan jumys tobyn uıymdastyryp, úsh otyrys ótkizdi.
«Bul másele qoǵamda úlken rezonans týǵyzyp, qyzý pikirtalas boldy. О́ıtkeni qazirgi kezde memleket tarapynan adam quqyqtaryna kóp kóńil bólinip otyr. Sondaı-aq qazaqstandyqtar qoǵamdyq mańyzdy taqyryptardy talqylaýǵa jáne memlekettik saıasatty qalyptastyrýǵa belsendi atsalysyp jatyr. Qazaqstanda prezıdenttik reformalar aıasynda demokratııalyq damý, adam quqyqtaryn qorǵaý jáne zań ústemdigin nyǵaıtý úshin barlyq qajetti zańnamalyq jaǵdaı jasalǵan. Sonyń biri – petısııa ınstıtýty», dedi A.Balaeva.
Ol Konstıtýsııa normalaryna jáne halyqaralyq mindettemelerge sáıkes bizdiń elimiz kemsitýge qarsy saıasatty júzege asyratyny, sonyń negizinde qoǵamda konstıtýsııalyq kepildik, janjal týdyrmaý jáne toleranttylyqtyń saqtalýyn qamtamasyz etý mindettelgenin atap ótti. «Qoǵamdaǵy osyndaı mańyzdy petısııany talqylaýǵa kóptegen otandasymyz qatysyp, kóterilgen máseleler boıynsha pikirler ekige jaryldy», dedi ol.
Mádenıet jáne aqparat mınıstri atalǵan jumys tobyna qoǵamnyń túrli toptary arasynan 45 adam kirgenin, atap aıtqanda, quzyrly memlekettik organ ókilderi, Parlament depýtattary, qoǵamdyq birlestikter, sarapshylar men barlyq múddeli tarap qatysyp, qoǵamnyń úlken bóligi máseleni talqylaýǵa belsendi aralasqanyn aıtty.
«Jumys tobynyń eki otyrysyn jáne aýqymdy saraptamalyq talqylaýlar ótkizý kezinde ótinish boıynsha kelip túsken eskertýler taldanyp, júıeli jumys júrgizildi. Ulttyq jáne halyqaralyq normatıvtik-quqyqtyq aktilerge salystyrmaly taldaý jasaldy. Petısııada kóterilgen máselelerdi retteýdiń halyqaralyq tájirıbesi zerdelendi. Jetekshi ulttyq ǵylymı-zertteý uıymdarymen jáne sarapshylarmen keńes ótkizildi. Petısııa taqyryby boıynsha halyqaralyq jáne qazaqstandyq úkimettik emes uıymdar usynǵan pikirler, usynystar men dálelder, zertteý materıaldary men úndeýlerdiń barlyǵy nazarǵa alyndy», dep atap ótti mınıstr.
Onyń aıtýynsha, bul jumys petısııa boıynsha túpkilikti sheshim qabyldaýǵa jetkiliksiz. Zertteýler men talqylaýlar qazirgi ýaqytta bul baǵyttaǵy aýqymdy jumystardy jalǵastyryp, máseleni jan-jaqty zerttep, ony retteýdiń naqty tetikterin ázirleý kerektigin kórsetti. Bul ýaqyt alady.
«Degenmen, Mádenıet jáne aqparat mınıstrliginiń ustanymy – kámeletke tolmaǵandardyń quqyǵyn qorǵaý jáne qaýipsizdigin qamtamasyz etý turǵysynan petısııany ishinara qoldaý. Balalardyń jynystyq qol suǵylmaýshylyǵyna qarsy qylmystardyń ósýi aıasynda «Jasóspirimder men balalardy jynystyq qatynastardy, onyń ishinde dástúrli emes qatynastardy nasıhattaý men kýlt jasaýdan qorǵaý» talaby ózekti ári qajet. Balalarymyzdyń qaýipsiz aqparattyq ortada ósip, damýy óte mańyzdy. Bizdiń urpaq aldyndaǵy paryzymyz – olarǵa durys rýhanı-adamgershilik baǵyt-baǵdar berip, dástúrli otbasylyq qundylyqtardy boıyna sińirý. Sondaı-aq ulttyq mádenı murany ustanýǵa jáne genetıkalyq kodty saqtaýǵa jaǵdaı jasaý óte mańyzdy», dedi A.Balaeva.