Memleketke qaıtarylǵan qarjy

Sybaılas jemqorlyqqa qar­sy is-qımyl agenttigi Q.Saty­baldyulyna qatysty «Qazaqtele­kom» AQ, «Kólik servıs ortalyǵy» AQ qarajatyn asa iri mólsherde jymqyrý, qylmystyq jolmen alynǵan aqshany jáne ózge de múlikti zańdastyrý (jylystatý), sondaı-aq óz baqylaýyn­da­ǵy kompanııanyń kedendik bajyn tóleýden jaltarýy sekildi faktiler boıynsha qylmystyq isterdi tergedi.

Agenttiktiń málimetinshe, 2022 jyldan bastap qazirgi ýaqytqa deıin Q.Satybaldyuly jáne ony­men baılanysty adamdardan memleketke zańsyz ıemdenilgen 732,8 mlrd teńge nemese 1,6 mlrd dollardan astam somaǵa múliktik aktıvter men aqshalaı qarajat qaıtarylǵan. Onyń ishinde 661,5 mln dollar shetelden qysqa merzimde elge jetkizildi. Atap aıtqanda, onyń zańsyz aktıvterdi Aýstrııa, Lıhtenshteın, BAÁ, Túrkııa  t.b. elderge jymqyr­ǵany anyqtalǵan.

Memleket menshigine ótken aktıvter ishinde ákimshilik ǵı­marattar, eksklıýzıvti zerger­lik buıymdar, lıýks úıler, páter­ler men avtokólikter, aksııalar men­ kompanııalardyń úlesteri, temirjol men aqsha qa­ra­jattary bar. Naqtyraq aıt­saq, olar – «Qazaqtelekom» AQ aksııalarynyń 28,8% (93,8 mlrd tg), «KSO» AQ (30,2 mlrd tg), 4 kompanııadaǵy qatysý úlesi (10,3 mlrd tg), elimizdegi múliktik aktıvter (158,5 mlrd tg), eksklıýzıvti zergerlik buıymdar (105,39 mlrd tg), qazaqstandyq shottardaǵy aqsha (36,8 mlrd tg), Aýstrııadan kelgen aqsha (36,8 mlrd tg), Lıhtenshteınnen túsken aqsha (116,7 mlrd tg), BAÁ-den kelgen aqsha (6,3 mlrd tg), Túrkııadan kelgen aqsha (2,2 mlrd tg), baǵaly qaǵazdardy satýdan túsken qarjy (135,8 mlrd tg).

Máselen, quny 158 mlrd teńgeden asatyn eldegi 115 múlik­tik­ aktıvterdiń ishinde 73 jyljymaıtyn múlik (13 úı, 10 ǵımarat, 13 jer ýchaskesi, 4 páter, 3 ǵımarat, qosymsha salynǵan 2 medrese ǵımaraty, 2 turaq orny, 25 úı-jaı, 1 aıaqtalmaǵan qurylys nysany), 37 jyljymaly múlik (29 avtokólik, 5 arnaıy tehnıka, 3 kvadrosıkl) jáne ózge de aktıvter bar. Olardyń bir bóligi jaqyn týys­taryna, úlestes adamdarǵa jáne baqylaýdaǵy kompanııalar­ǵa resimdelgen.

Astana men Almaty qalala­ryn­da memleketke berilgen ákim­shilik ǵımarattardyń jalpy aýda­ny 180 myń sharshy metr­den asady. Buryn bul aktıvter jalǵa berilip, jyl saıyn men­shik ıesine mıllıardtaǵan tabys ákelgen. Lıýks nysandarynyń biri – Aqmola oblysynyń Ba­rap aýlyndaǵy 135 gektar jer ýchas­kesinde ornalasqan, jalpy aýdany 1,5 myń sharshy metrdi quraıtyn Q.Satybaldyulynyń burynǵy rezıdensııasy Astana qalasynyń Bilim basqarmasyna berildi.

Sybaılas jemqorlyqqa qar­sy is-qımyl agenttiginiń sońǵy málimetine qaraǵanda, 2022 jyldan beri memleketke 1 trln teńgeden astam zańsyz ıemdenilgen aktıv qaıtarylǵan. Kórip otyr­ǵanymyzdaı, bul somanyń basym bóligin Q.Satybaldynyń aktıvteri quraıdy.

Aıta keteıik, qaıtarylǵan aktıvterdiń bári memleket men­shigine ótip, aldaǵy ýaqytta áleý­mettik maqsattarda paıdala­nylmaq.