Teńge ilýden QR ulttyq quramasy, V Dúnıejúzilik kóshpeliler oıyndarynda el namysyn qorǵaıtyn úsh úzdik sportshyny anyqtady, dep habarlaıdy Egemen.kz Ulttyq sport qaýymdastyǵynyń baspasóz qyzmetine silteme jasap.
«Irikteý saıystarynyń nátıjesinde 3 stıl boıynsha 3 úzdik sportshyny anyqtadyq. V Dúnıejúzilik kóshpeliler oıyndarynda saıystyń barlyq túrinen altyn ıelenemiz degen senim bar. Ol úshin bar múmkindigimizdi paıdalanamyz», - dedi QR Ulttyq jáne at sporty túrlerinen memlekettik jattyqtyrýshy Nurken Baıbórıev.
Elimizdiń eń úzdik 6 teńge ilýshisi Kóshpeliler oıyndaryna tikeleı joldama beretin 3 oryndy sarapqa salyp, irikteý oıyndaryna qatysqan.
Sportshylarymyz «Qos qulash», «Bes beles», «Jeti qut» stılderi boıynsha baq synady. Qorytyndylaı kele, 5-shi Dúnıejúzilik kóshpeliler oıyndarynda el namysyn kelesi sportshylar qorǵaıdy:
«Bes beles» stılinen Beknur Serikov; «Jeti qut» stıli boıynsha Baqyt Tóltaı; «Qos qulash» stılinen Rahat Qambarov.«Men bala kezimnen atqa jaqyn óstim. Teńge ilý sportyna kelýime de sebep bolǵan jylqyǵa degen mahabbatym. Búginde V Dúnıejúzilik kóshpeliler oıyndaryna daıyndyq joǵarǵy deńgeıde ótip jatyr. El namysyn abyroımen qorǵaý úshin barymyzdy salamyz», dedi teńge ilýden ulttyq qurama múshesi Baqyt Tóltaı.
Aıta keteıik, teńge ilýden V Dúnıejúzilik kóshpeliler oıyndary aldyndaǵy qorytyndy oqý-jattyǵý jıyny 27 tamyz ben 7 qyrkúıek aralyǵynda Astanada ótedi. Oqý-jattyǵý jıyndaryn QR Týrızm jáne sport mınıstrliginiń Ulttyq jáne at sporty túrleri ortalyǵy uıymdastyrdy. Al Kóshpeliler oıyndarynda teńge ilý boıynsha jarystar 11-13 qyrkúıek aralyǵynda Etnoaýyl aýmaǵynda ótedi.
Eske sala keteıik, 8-13 qyrkúıekte Astana qalasynda V Dúnıejúzilik kóshpeliler oıyndary ótedi. Is-sharaǵa 89 elden 2000-nan astam sportshy qatysady dep josparlanǵan.