Kompanııanyń bas dırektory Vadım Basın Qasym-Jomart Toqaevqa kómir óndirisi bólimshesin damytý jóninde baıandady, dep habarlaıdy Egemen.kz Aqordanyń baspasóz ortalyǵyna silteme jasap.
Atap aıtqanda, byltyr kómir tek 3 shahtadan óndirilse, endi Prezıdent tapsyrmasyna saı qysqa merzim ishinde barlyq 8 shahtadaǵy jumys qalpyna keltirildi. О́ndiristik qaýipsizdikti kúsheıtý úshin aýqymdy jumystar qolǵa alyndy.
Prezıdent shahterlerdiń óndiristegi qaýipsizdigin qamtamasyz etý baǵytynda qabyldanǵan tyń sharalarmen tanysty. Dıspetcherler naqty ýaqyt rejıminde barlyq shahtadaǵy ahýaldy baqylap, gaz deńgeıine taldaý júrgize alady. Budan bólek kenshilerdiń jumysyn úılestirip, olarmen beınebaılanys ornatady. Sonymen qatar ortalyqta júıedegi qaýipsizdik baqylanyp, óndiristik kórsetkishter men prosesterdiń oryndalý barysyna monıtorıng júrgiziledi. 2025 jyldyń sońyna deıin barlyq 8 shahtadaǵy kenshilerdiń júrgen jeri men densaýlyq jaǵdaıyn naqty anyqtaıtyn qondyrǵy júıesi ornatylady.
Memleket basshysy «Saran» shahtasynda, 620 metr tereńdikte jumys istep jatqan kenshilermen beınebaılanys arqyly sóılesti. Kásiporyn jumysshylardy jańa alarmphone qurylǵysymen jabdyqtaǵan. Qorǵanys deńgeıi asa joǵary gadjette qyzmetkermen jedel baılanysýǵa arnalǵan smartfon fýnksııasy bar.
Qasym-Jomart Toqaev kenshilerge jankeshti jumysy úshin alǵys aıtyp, shahterlerdiń qyzmetinde eńbek qaýipsizdigin saqtaý mańyzdy ekenine nazar aýdardy.