Bıyl Túrkistan oblysynda «Mektepke jol» aksııasy aıasynda áleýmettik osal otbasynan shyqqan 60 693 balaǵa memlekettik qoldaý kórsetiledi. О́ńirdegi ekonomıkalyq esepteýler nátıjesinde ár balaǵa 43 407 teńgeden úlestiriledi.
Oblystyq bilim basqarmasynyń habarlaýynsha, joǵaryda atalǵan sanattaǵy otbasy balalaryna kıim men oqý-quraldaryn alý úshin bilim uıymy basshysynyń atyna balanyń ata-anasy nemese zańdy ókilderi ótinish berýge tıis. Keıin ata-ana ne zańdy ókil bilim uıymyna satyp alynǵan taýarlardyń ataýy kórsetilgen shyǵystar týraly rastaıtyn qujatty tapsyrýy kerek. Búginde aýdandarda aksııa aıasyndaǵy is-sharalar bastalyp ta ketti. Mysaly, Túlkibas aýdany ákimdiginiń uıymdastyrýymen «Mektepke jol» aksııasy sheńberinde kóterme baǵada mektepke qajetti zattardyń jármeńkesi ótti. Jármeńkede usynylǵan mektepke qajetti kıim men qural-jabdyqtar saýda ortalyqtary men bazar baǵasynan edáýir arzan baǵada, mysaly jeıdeler 2 myń teńgeden, sporttyq aıaqkıim men týflıler 2–5 myń teńgeniń arasynda, 12 paraqtyq dápterler – 10 teńge, sómkeler 3–5 myń teńgeden saýdalandy.
Bul – jármeńkedegi baǵa. Al túrkistandyq ata-analardyń aıtýynsha, birinshi synypqa baratyn ul balany kem degende 37000 teńgege bastan-aıaq kıindire alasyz. Oblys ortalyǵyndaǵy saýda oryndarynda birinshi synypqa baratyn ul balanyń jeıdesi 2–4 myń teńge, mektep formasy – 7–9 myń, aıaqkıimi – 10–15 myń, sporttyq kostıým 8 myńnan bastalyp, sapasyna qaraı 13 myń teńgege deıin satylyp jatyr. Sporttyq aıaqkıimniń baǵasy 10–12 myń teńge aralyǵynda. Bastaýysh synypta oqıtyn qyz balany kıindirý kem degende 43500 teńgege túsedi eken. Dápter-qalamyn qospaǵanda. Balaǵa qajetti qaǵaz-qalamdy eseptep, barynsha únemdik jaǵyn eskergen, dúkenderdiń áleýmettik jelidegi paraqshalaryn qarap-zerttep, arzan jerden alǵan ata-analar ár balaǵa – 60 myń teńgeden jumsaǵanyn aıtady. Al keńse taýarlaryn satýshylardyń aıtýynsha, bir balaǵa sómkemen qosqanda baǵasy ortasha zattar alatyn bolsa 10–12 myń teńgeden bolyp jatyr. Kil qymbat, sapasy joǵarysyn alatyndarǵa jıyntyq – 17 000 teńgeden aınalady. Saýda oryndarynda usynylatyn kıimder men kerekti zattardyń baǵalary, ásirese kópbalaly otbasylar úshin qymbat kórineri anyq. Iаǵnı «Jaqsylyq jasa» uranymen ótkiziletin aksııa aıasynda óńir kásipkerleri, mesenattar jáne ózge de azamattardyń qoldaý bildirýi mańyzdy.
Igi isten shet qalmaǵan oblystyq Jastar resýrstyq ortalyǵy da «Mektepke jol» aksııasyn uıymdastyrdy. Aksııa aıasynda 17 aýdan, qaladan kelgen 8–14 jas aralyǵyndaǵy 100-ge jýyq balaǵa mektepke qajetti qural-jabdyqtarmen qamtylǵan sómkeler berildi.
Túrkistan oblysy