Dástúrli sadaq atýdan ulttyq qurama sportshylary 5-shi Dúnıejúzilik kóshpeliler oıynyna daıyndyǵyn pysyqtap jatyr, dep jazady Egemen.kz.
Sadaqshylar dúbirli dodada saıys ótetin «Qazanat» ıppodromynda jattyǵyp jatyr.
Dástúrli sadaq atýdan ulttyq qurama bas bapkeri Dıas Ahmetovtiń aıtýynsha, búginde DKO aıasynda ótetin dástúrli sadaq atý saıysyna qatysýǵa 35 memleketten ótinish túsken.
«Qazir akkredıtasııa jumystary júrgizilip jatyr. Baıraqty básekede Túrkııa, Malaızııa, Qyrǵyzstan, Vengrııa, Reseı syndy memleketterdiń sadaqshylary jaqsy óner kórsetetini belgili. Degenmen, bizdiń sportshylarymyz ózderiniń myqtylyǵyn dáleldeıtinine senimdimin», dedi Dıas Ahmetov.
Elordada ótetin básekege el sportshylary tyńǵylyqty daıyndalyp jatyr. Olar Dúnıejúzilik kóshpeliler oıyndarynyń Qazaqstanda uıymdastyrylýy úlken jaýapkershilik júkteıtinin aıtty.
«Bul jarys bizdiń alańda ótetin bolǵandyqtan moınymyzda zor jaýapkershilik bar ekenin bilemiz. Al saıys ótetin alańda jattyǵý biz úshin jaqsy múmkindik. О́ıtkeni bul jerdi tolyq zerttep, klımatyn, jel jyldamdyǵyn, nysananyń ornalasýy syndy mańyzdy tustardy túrtip alyp jatyrmyz», dedi sadaq atýdan ulttyq qurama múshesi Baqbergen Sálimov.
Aıta keteıik, 8-13 qyrkúıekte Astana qalasynda 5-shi Dúnıejúzilik kóshpeliler oıyndary ótedi. Is-sharaǵa 89 elden 2000-nan astam sportshy qatysady dep josparlanyp otyr.