Bıyl 163 km jylý jelilerin jańǵyrtýǵa respýblıkalyq bıýdjetten 92,5 mlrd teńge qarastyrylǵan, dep habarlaıdy Egemen.kz.
Úkimettiń málimetinshe, 109 km jylý jelilerin jóndeýge beriletin nysanaly transfertter esebinen 68,6 mlrd teńge bólingen, 54 km rekonstrýksııalaýǵa shamamen 23,9 mlrd teńge Úkimet rezervinen jiberilgen.
Sondaı-aq tabıǵı monopolııalar sýbektileriniń ınvestısııalyq baǵdarlamalary esebinen jalpy somasy 16,6 mlrd teńgege 68,8 km jylýmen jabdyqtaý jelisin qaıta jańartý josparlanǵan.
«Búgingi tańda jergilikti atqarýshy organdarǵa qarjylandyrý josparyna sáıkes sáýir aıynan bastap 92,5 mlrd teńgeniń 37,5 mlrd teńgesi aýdaryldy. Bul rette jylýmen jabdyqtaýdyń 63 jobasynyń 8 jobasy boıynsha jumys aıaqtalyp, 51 joba boıynsha jelilerdi tóseý bastaldy, 82 km jol salyndy», dep málimdedi Qanat Sharlapaev.
Eske sala keteıik, 12 tamyzdan bastap ónerkásip jáne qurylys mınıstrligi TKSh jáne áleýmettik sala obektilerin aldaǵy jylytý maýsymyna daıyndaý boıynsha keshendi tekserý júrgizip jatyr.
Sonymen qatar ákimdikterge qyrkúıek aıynyń sońyna deıin jylý jelilerindegi jóndeý jumystaryn aıaqtaý tapsyryldy. Sondaı-aq 1 qyrkúıekke deıin bilim berý obektileriniń, 15 qazanǵa deıin densaýlyq saqtaý, TKSh jáne turǵyn úı qorynyń obektileriniń tolyq daıyndyǵyn qamtamasyz etý qajet.