Prezıdent janyndaǵy Qazaqstannyń strategııalyq zertteýler ınstıtýtynyń tapsyrysy boıynsha 2024 jylǵy 7-18 tamyz aralyǵynda telefon arqyly saýalnama júrgizildi, dep habarlaıdy Egemen.kz.
Instıtýttyń málimetinshe, iriktemeli jıyntyq kólemi 1200 respondentti qurady. Saýalnamaǵa 17 oblystan jáne respýblıkalyq mańyzy bar Astana, Almaty, Shymkent qalalarynan 18 jastan asqan respondentter qatysty.
«Jalpy, saýalnamaǵa qatysqandardyń kópshiligi (53,1%) AES salý ıdeıasyn qoldaıdy. AES salý ıdeıasyn qoldaıtyndar oǵan úlken úmit artady, sonyń ishinde 2030 jylǵa qaraı elektr tapshylyǵy máselesi sheshiledi dep senedi», delingen habarlamada.
AES salý ıdeıasyna qarsy adamdar (32,5%) negizinen yqtımal apattar men olardyń qorshaǵan ortaǵa tıgizetin zardaptaryna alańdaýshylyq bildirdi.
Sonymen qatar árbir onynshy respondent (14,4%) óz tańdaýyn áli jasaǵan joq.
Sondaı-aq respondentterdiń jartysy (51,0%) AES qurylysyna qatysty referendýmda «qoldaý» nemese «qarsy» dep daýys berý úshin aqparatqa tolyq qol jetkizgen. Respondentterdiń taǵy 12,2%-y aqparatty tolyq bilmeıdi. Saýalnamaǵa qatysqandardyń 31,6%-y múldem eshqandaı aqparat almaǵan, al 5,2%-y jaýap berýge qınaldy.
Saýalnama barysynda respondentterdiń 42,6%-y AES salý máselesi boıynsha referendýmǵa qatysýǵa tolyqqandy nıet bildirdi. Al 16,4%-y qatysýy múmkin ekenin aıtty. Respondentterdiń 25,3%-y referendýmǵa qatyspaıdy, 8,9%-y qatyspaýy múmkin, al 6,8%-y jaýap berýge qınaldy.