Elordadaǵy Dostyq úıinde Astana qalasy Qazaqstan halqy Assambleıasynyń uıymdastyrýymen «Mektepke jol» aksııasy ótti. Qaıyrymdylyq naýqan aıasynda 200-den astam balaǵa oqý quraldary berildi. Syılyqty etnomádenı birlestikterdiń músheleri, Analar keńesi, «Jomart jan» ortalyǵy tartý etti.
Materıaldyq kómektiń jalpy somasy 4 mln teńgeni quraıdy. Jomart jandar balalarǵa qyzyqty oıyn-saýyq baǵdarlamasyn da usyndy. Igi is-sharanyń ashylý saltanatyna Astana qalasy Ishki saıasat basqarmasynyń basshysy Nurdáýlet Álmuhanov qatysyp, aksııaǵa qoldaý kórsetken barlyq janashyr janǵa alǵys bildirdi.
– «Mektepke jol» respýblıkalyq aksııasy jyl saıyn dástúrli túrde jalǵasyp keledi. Bul aksııa Astana qalasynyń Qazaqstan halqy Assambleıasynyń qoldaýymen ótip jatyr. Balalarǵa mektepke qajetti barlyq qural-jabdyq berildi. Osy oraıda aksııaǵa atsalysyp, kómek kórsetken demeýshilerge alǵysymdy bildiremin, – dedi basqarma basshysy.
Jyl basynan beri qalalyq Assambleıa músheleri kórsetken qaıyrymdylyq jáne gýmanıtarlyq kómektiń jalpy somasy shamamen 49,5 mln teńgeni quraıdy. О́z kezeginde Astana qalasy QHA Aqsaqaldar keńesiniń múshesi Ámirjan Álpeıisov aksııanyń maqsatyna toqtaldy.
– Bizdiń kózdegenimiz – oqýshylardy mektepke qajetti barlyq qural-jabdyqpen qamtamasyz etý, turmys jaǵdaıy tómen jáne kópbalaly otbasydan shyqqan balalarǵa jańa oqý jyly aıasynda áleýmettik qoldaý kórsetý, – dedi ol.
1 tamyzdan 30 qyrkúıekke deıin az qamtylǵan, kópbalaly otbasylar, jetim balalar jáne ata-anasynyń qamqorlyǵynsyz qalǵan balalar qataryndaǵy bilim alýshylarǵa «Mektepke jol» respýblıkalyq aksııasy aıasynda demeýshilik qarajaty esebinen kerek-jaraqtary bar mektep sómkeleri túrinde kómek kórsetiledi. Igi is aıasynda barlyǵy 8 500-den asa balany qamtý josparlanyp otyr.