QR Ákimshilik quqyq buzýshylyq týraly Kodeksiniń 312-baby 2-bóligi boıynsha Astana qalasynyń ákimshilik quqyq buzýshylyq jónindegi mamandandyrylǵan aýdanaralyq sotynyń qaýlysymen sapasyz qurylys-montaj jumystaryn oryndaǵany úshin 5 kompanııa qurylys lısenzııalarynan aıyryldy, dep habarlaıdy Egemen.kz.
Olar:
1. «Prom Stroı Garant Kz» JShS. Ǵımarattar men qurylystardyń, onyń ishinde kópirlerdiń, kólik estakadalarynyń, tonnelder men jol ótpeleriniń, nysandardy kúrdeli jóndeýdi jáne rekonstrýksııalaýdy qamtıtyn ózge de jasandy qurylystardyń tirek jáne qorshaý konstrýksııalaryn salý boıynsha qurylys-montajdaý jumystaryna qatysýǵa II sanattaǵy lısenzııadan aıyryldy.
2. «Granite» JShS. Ǵımarattar men qurylystardyń tirek jáne qorshaý konstrýksııalaryn kúrdeli jóndeý men rekonstrýksııalaýdy, turǵyzýdy, topyraqtaǵy arnaıy jumystardy qamtıtyn ınjenerlik jeliler men júıelerdiń kishi túrleri boıynsha qurylys-montajdaý jumystaryna qatysýǵa II sanattaǵy lısenzııadan aıyryldy.
3. «Ǵımarattar men qurylystar qurylysy» JShS. Qurylys-montajdaý jumystaryna lısenzııadan aıyryldy.
4. «Sheberbuild» JShS. Qurylys-montajdaý jumystarymen aınalysýǵa 2023 jylǵy 18 qazandaǵy №23022845 lısenzııasynan aıyryldy.
5. «Astana-Kóktem S» JShS. 2022 jylǵy 25 qarashadaǵy №0000360 ǵımarattar men qurylystardyń, onyń ishinde kópirlerdiń, kólik estakadalarynyń, tonnelder men jol ótpeleriniń, nysandardy kúrdeli jóndeý men rekonstrýksııalaýdy, onyń ishinde shatyr jabyndaryn qosa alǵanda, tirek jáne qorshaý konstrýksııalaryn turǵyzýdyń, monolıtti ornatý, sondaı-aq qurama beton jáne temirbeton konstrýksııalaryn montajdaý, qabyrǵalar men bólimderdiń dana elementterin qalaý jáne oıyqtardy toltyrý, topyraqtaǵy arnaıy jumystar, onyń ishinde negizderdi salý boıynsha qurylys-montajdaý jumystaryna qatysýǵa lısenzııasynan aıyryldy.
Aıta keterligi, 2024 jyly júrgizilgen jospardan tys tekserý barysynda «Astana qalasynyń qalalyq orta sapasy jáne baqylaý basqarmasy» MM atalǵan kompanııalar tarapynan 426 zań buzýshylyqty anyqtap, ony joıýǵa 192 uıǵarym bergen.