Keshegi keńes ókimeti kezinde de el jaǵdaıyna eleńdeıtin, halyq úshin bárin de berem deıtin, eńbegin aq júrip, adal atqarǵan, sóıtip, myqty basshy degen atty alǵan azamattar az bolǵan joq. Solardyń biri – Jambyl oblysyndaǵy shalǵaıda jatqan Moıynqum aýdanyna shırek ǵasyrǵa jýyq jemisti jetekshilik etken soǵys ardageri Aıtbaı Nazarbekov.
Aqyl, parasaty mol Aıtekeń ultymyzdyń kóptegen aqyn-jazýshysyn, óner adamdaryn jıi-jıi aýdanǵa shaqyryp, qonaq etken. Keıbireýimen, tipti dostas, syrlas ta bolǵany belgili. Qazaq ádebıetiniń klassıgi, sóz zergeri Ǵabeń, Ǵabıt Músirepovpen de árdaıym áńgimesi jarasyp, jaqsy syılasqan. Dara sýretker Moıynqum jerinde úsh-tórt ret asa qadirli meıman bolyp, ań atqan, balyq aýlaǵan, tipti birge kelgen serikterimen tańdy-tańǵa uryp, talaı ret karta-preferans oınaǵan.
Al endi osyndaı ózara qarym-qatynastan keıin Ǵabeńniń Moıynqumǵa qalaısha búıregi burmaıdy. Sondyqtan ol kisiniń myna sýrettegideı qumdy ólke azamattarynyń arasynan tabylýynyń da ózinshe bir máni bar.
...1973 jyly 22 qarashada qazirgi Taraz, burynǵy Jambyl qalasynda oblys ıntellıgensııasynyń I sezi ótkizilip, bul alqaly basqosýǵa Ǵabeń de qatysqan. Iá, shyraıly, shynaıy shyǵarmalarymen qazaq ádebıetinen oıyp turyp oryn alǵan jazýshy Jambyl oblysy zııaly qaýymynyń jıynyna Moıynqum aýdanynan saılanǵan delegattardyń qaq ortasynda otyr. Baıaǵy ózine ǵana tán, ózine ǵana jarasatyn mańǵaz, tákapparlaý keıipte...
Sol jaǵynda Aıtekeń, Aıtbaı Nazarbekov, oń jaǵynda Moıynqum aýpartkomynyń ekinshi hatshysy Bılibaı Qashaǵanov (qalyń qazaqqa tanymal memleket jáne qoǵam qaıratkeri Ekeıbaı Qashaǵanovtyń inisi) pen bilikti pedagog, mektep dırektory, sondaı-aq myqty ańshy, balyqshy bolǵan maıdanger Álıhan Esjanov.
Qalǵandarynyń atyn atap, túsin tústeýge gazet beti kótermeıdi ǵoı...
Berikbaı QADYQOV,
jýrnalıst
Almaty oblysy,
Qarasaı aýdany