Parıj Olımpıadasyn 5-orynmen aıaqtaǵan dzıýdoshy Ábıba Ábýjaqynova 11-13 qazan aralyǵynda Abý-Dabıde ótetin Grand Slam týrnırinde baq synaıdy, dep jazady Egemen.kz.
Dzıýdoshynyń jyl sońyna deıingi jarys kestesin bas bapker Erlan Alpysbaev Ulttyq olımpıadalyq komıtetke bergen suhbatynda tarqatyp aıtty.
Alpysbaev tórtjyldyqtyń basty dodasy aıaqtalsa da, osy jyly ótetin iri sporttyq básekeler bar ekenin atap ótti. Qazir dzıýdodan qyzdar quramasy Túrkistan oblysynda oqý-jattyǵý jıynyn ótkizip jatyr.
Al quramanyń basty juldyzdarynyń biri Ábıba Ábýjaqynova qazir demalysta. Ol jattyǵýǵa Aqtaýda ótetin kelesi jıynda qosylady.
«Ábıbanyń Qazaqstan chempıonatyna qatysatyny áli belgisiz. Qazan aıynda ótetin Abý-Dabıdegi Grand Slam týrnırine qatysady. Olımpıadadan keıin Ábıbany «Jeńis» klýby demalysqa jiberdi. Parıj oıyndaryna fransýz mamandarymen jáne jeke bapkerimen de daıyndaldy. Azdaǵan demalystan soń Ábýjaqynova tatamıge qaıta oralady. Bıylǵy maýsymda áli qatysatyn dodalar bar», dedi Erlan Alpysbaev.