Qazaq sport jáne týrızm akademııasy Parıj Olımpıadasynyń kúmis jáne qola júldegerlerine tegin grant berdi, dep habarlaıdy Egemen.kz.
Aıta keterligi, Parıj Olımpıadasynda el qorjynyna túsken jeti medaldiń beseýin akademııa túlekteri ıelengen. Osyǵan baılanysty oqý orny Olımpıada júldegerlerin 1-kýrs stýdentterimen kezdesýge shaqyrǵan.
Bul bilim ordasy úshin úlken mártebe ári maqtanysh. Sondyqtan Demeý Jadyraev, Narıman Qurbanov, Ǵusman Qyrǵyzbaev, Nazym Qyzaıbaı, Islam Sátbaev syndy sportshylardyń esimderi endi bilim ordasynyń Olımpıada júldegerleri stend taqtasyna altyn árippen jazylady. El maqtanyshyna aınalǵan sportshylarymyz oqýǵa endi qabyldanǵan 1-kýrs stýdentteri men ózge de izbasarlaryna aqyl-keńesterin aıtyp, úlken motıvasııa berdi, - dep jazdy akademııa óz paraqshasynda.
Al Qazaq sport jáne týrızm akademııasynyń prezıdenti Qaırat Zakırıanov Parıj Olımpıadasynyń júldegerleri Demeý Jadyraevqa doktorantýrada, Narıman Qurbanov pen Ǵusman Qyrǵyzbaevqa magıstratýrada tegin bilim alýǵa múmkindik beretin Akademııa grantyn tabystaǵan.
Praktıka júzinde bilgen-túıgenimizdi endi teorııamen ushtastyrýǵa, ǵylymı turǵyda izdenýge múmkindik bergen, ózim oqyǵan akademııa basshylyǵyna rızashylyǵymyzdy bildiremiz. Al artymyzdan erigen jas órenderge sáttilik tileımiz. Alǵa qoıǵan maqsattaryńa jetýden eshqashan sharshamańdar, - dedi Olımpıadanyń kúmis júldegeri Demeý Jadyraev.
Esterińizge sala keteıik, jazǵy Parıj Olımpıadasynda grek-rım kúresinen Demeý Jadyraev «kúmis», sporttyq gımnastıkadan Narıman Qurbanov «kúmis», al Ǵusman Qyrǵyzbaev dzıýdodan «qola» medal jeńip aldy.