Petropavlda alaıaqtyqtyń jańa túri beleń aldy. Polısııa qyzmetkerleri qala turǵyndaryn aldap soqqan kúdiktini ustady, dep habarlaıdy Egemen.kz.
Ishki ister mınıstrliginiń habarlaýynsha, tamyz aıynyń basynda Petropavl qalasynyń polısııa basqarmasyna ınternet-alaıaqtyq týraly ótinishpen 22 jastaǵy jigit pen qyz júgingen. Olardyń eshqandaı nesıeleri bolmaǵan. Alaıda, lombardqa qaryz ekenderi týraly sms-habarlamalar alǵan.
«Osydan bir aı buryn jábirlenýshilerge beıtanys jas jigit jaqyndap kelip, telefondaryn belgili bir derekqor arqyly tekserýdi usynǵan. Onyń kómegimen gadjettiń urlanbaǵan ekenin rastaýǵa bolady dep túsindirgen. Jábirlenýshiler ózderiniń telefondary men jeke kýálikterin sýretke túsirýge, sondaı-aq IMEI-kodtaryn jazyp alýǵa múmkindik bergen. Alaıaqtar beıtanys telefonnyń «bazada tirkelmegenin» aıtqan. Keıin jábirlenýshiler olardyń qurylǵylary onlaın-rejımde qaryz beretin lombardtyń kepili bolǵanyn bilgen. Keltirilgen zalal ár jaǵdaıda 35 myń teńgeni qurady», delingen habarlamada.
Jedel-izdestirý is-sharalarynyń nátıjesinde oblystyq Polısııa departamenti krımınaldyq polısııa basqarmasynyń jáne Petropavl qalasynyń «Cyberpol» tobynyń qyzmetkerleri kúdiktini anyqtaǵan. Ol 18 jastaǵy Petropavl qalasynyń turǵyny bolyp shyqqqan. Kúdikti 13 tamyzda Jumabaev kóshesiniń boıynda ustalǵan.
«Atalǵan derekter boıynsha sotqa deıingi tergeý júrgizilip, kúdiktiniń basqa da qylmysqa qatysy bar-joǵy tekserilip jatyr. Qupııa derekterińizdi eshkimge bermeýińizdi suraımyz. Barynsha saq bolyńyzdar», dep eskertti SQO polısııa departamenti krımınaldyq polısııa basqarmasynyń bastyǵy Ivan Terzıdı.