Jetisý oblysy prokýratýrasy múmkindigi shekteýli jandardyń quqyǵy buzylǵanyn anyqtady, dep habarlaıdy Egemen.kz Bas prokýratýranyń baspasóz qyzmetine silteme jasap.
Aıta keteıik, Konstıtýsııanyń 28-baby múgedektik mártebesi bar azamattarǵa memleketten eń tómengi jalaqy mólsherinde tólem alýǵa kepildik beredi.
Prokýrorlar 2024 jyly medısınalyq uıymdar 3-4 toptaǵy onkologııalyq dıspanserlik esepte turǵan oblystyń 18 turǵynyn medısınalyq-áleýmettik saraptamaǵa jibermegenin anyqtaǵan. Osylaısha, olar múgedektigin rásimdeý jáne kepildik berilgen áleýmettik járdemaqy alý múmkindiginen aırylǵan.
«Prokýrorlyq qadaǵalaý aktisine sáıkes barlyq buzýshylyqtar joıyldy, barlyq adamdar medısınalyq-áleýmettik saraptamaǵa jiberildi, olardyń ekeýi áleýmettik tólemderdi taǵaıyndaý arqyly múgedektik mártebesin aldy», delingen habarlamada.
Nátıjesinde azamattardyń áleýmettik qamsyzdandyrý quqyǵyn buzǵany úshin úsh medısına qyzmetkeri jaýapkershilikke tartylǵan.