Elordamyzda ótip jatqan Dúnıejúzilik kóshpeliler oıyndarynyń ekinshi kúni jarys jolyna shyqqan Qorǵanys mınıstrligi Ortalyq sport klýbynyń sportshylary el qorjynyna bes altyn, bir kúmis medal saldy.
Qazaq kúresi, jamby atý jáne kýrashtan ótken saıystarda armııa sportshylary sátti óner kórsetti.
«Dúnıejúzilik kóshpeliler oıyndarynda sporttyń bes túrinen 14 armııa sportshysy synǵa túsip jatyr. Eki kún ishinde olar alty medal utyp aldy. 2025 jyly Astanada qazaq kúresinen halyqaralyq áskerı sport keńesiniń (CISM) álem chempıonaty ótedi. Bul jarysqa osy uıymnyń ókilderin arnaıy shaqyrdyq. Búgingi jarys – áskerı sportshylar arasynda qazaq kúresi jarysyn daıyndaý men nasıhattaýdyń mańyzdy kezeńderiniń biri», deıdi Qorǵanys mınıstrligi Sport komıtetiniń tóraǵasy – Ortalyq sport klýbynyń bastyǵy, polkovnık Arman Ábeýov.
Jamby atýdan Azııa stılindegi jarysta Qarýly kúshter qyzmetkeri Batyr Beksaýyt chempıon atandy. Bul sport túrinen 27 elden barlyǵy 78 sportshy baq synasty.
9 eldiń 64 sportshysy qatysqan aýdaryspaqta 70 kıloǵa deıingi salmaq dárejesinde Qarýly kúshter qyzmetshisi Almat Látipbek altyn medal ıelendi.
Qazaq kúresinen ótip jatqan jarysqa 41 elden segiz salmaq dárejesi boıynsha 274 sportshy (erler men áıelder) ótinim bergen. Balýandar beldesýi Jaqsylyq Úshkempirov atyndaǵy jekpe-jek saraıynda ótip jatyr. Bozkilemdegi saıysta Qarýly kúshter qyzmetshileri Bekjan Tólepov (55 kg), Jumajan Qojambekov (74 kg) jáne Baqyt Qusaqbaev (60 kg) jeńimpaz atandy.
Al kýrash týrnırinde armııa balýany aǵa leıtenant Marat Baıqamurov 100 kılodan asa salmaq dárejesinde kúmis medaldi jeńip aldy.