Shanhaıdaǵy «Kólik mýzeıi» kózdiń jaýyn alady. Sebebi úsh qabatty ǵımarattyń ishi Qytaı men álem elderiniń kólik tarıhynan syr shertetin temir tulparlarǵa toly.
Dúnıe júzine tanymal kompanııalardyń alǵash shyǵarǵan avtokólikterinen bastap az danamen jasalǵan modelderdi osy jerden kórýge bolady. Murajaı 2007 jyly ashylǵan. Mundaǵy eń qymbat kólik – 1955 jylǵy «Mercedes-Benz». Eki kisilik shaǵyn mashınanyń quny 4,6 mıllıon dollar. Álemdegi eń uzyn jeńil kólik «Buick-ti» de osy jerden tamashalaı alasyz. Bul jaqta 150-ge jýyq kóne qundy kólik qoıylǵan. Árbiriniń ózindik tarıhy bar. Mýzeı olardyń keıbirin aýksıondarda satyp alsa, endi birin kolleksıonerler ózderi kelip syıǵa tartqan.
Sý astyndaǵy sulýlyq
Meksıkanyń «Kankýn» atty demalys ortalyǵynda alyp sý asty mýzeıi bar.
2010 jyldyń jeltoqsan aıynda ashylǵan mýzeıde tórt myńǵa jýyq sáýlet eskertkishi ornalasqan. Músinderdiń árqaısysy sý astyndaǵy marjandy jartastarmen tutasyp ketý úshin tabıǵı materıaldardan jasalǵan. Tunyq sýdyń tereńinde ornalasqan óner mýzeıin túbi áınekten jasalǵan keme arqyly da tamashalaýǵa bolady. Mundaǵy ár músinniń ataýy da erekshe. Máselen, «Joǵalǵan úmit kolleksııasy», «Adam ot ishinde», «Úmit baǵy» syndy óner týyndylary tamsandyrmaı qoımaıdy. Olardyń kópshiligi brıtandyq músinshi Djeıson Dekeırs Teılorǵa, al qalǵandary jergilikti meksıkalyq músinshilerge tıesili.
Alyp adamnyń aǵzasy
Nıderland memleketiniń Leıden qalasynda ornalasqan «Korpýs» mýzeıi fızıologııany erekshe jaqsy kóretin jandar úshin taptyrmas múmkindik.
Sebebi munda bári shynaıy. Ǵımarattyń beınesin adamǵa uqsatyp jasaǵan. Ekskýrsııa barysynda adamnyń barlyq ishki músheleriniń qalaı jumys isteıtinin baıqaýǵa bolady. Týrıster ózin alyp adamnyń ishine kirip ketkendeı sezinedi. Mýzeıge kelýshiler adamnyń túshkirgende aǵzasynda ne bolatynyn baqylap nemese tamaq ishkennen keıin ishekte ne bolatynyn, uıqynyń ne úshin qajet ekenin túsinedi. 35 metrlik erekshe ǵımarattyń jobasyn jasaýǵa 12 jyl ketipti, al qurylysy 2 jylǵa sozylǵan.