Almatydaǵy Dostyq úıinde Qazaqstan halqy Assambleıasynyń ókilderi Prezıdent Joldaýyn talqylaýǵa arnalǵan kezdesý ótkizdi. Basqosýda Joldaýda aıtylǵan maqsat-mindetterdi júzege asyrý tetikteri, QHA-ǵa qarasty etnomádenı birlestikterdiń jumys jospary saralandy.
Kezdesýge Qazaqstan halqy Assambleıasy tóraǵasynyń orynbasary – Prezıdent ákimshiligi QHA Hatshylyǵynyń meńgerýshisi Marat Ázilhanov, qalalyq máslıhat depýtattary, Qazaqstan halqy Assambleıasynyń músheleri, etnomádenı birlestikterdiń ókilderi men «Assambleıa jastary» uıymynyń belsendileri qatysty.
Is-sharany ashqan M.Ázilhanov Joldaýda aıtylǵan mindetterdiń júıeli júzege asýyna bir shańyraq astyna jınalǵan tatý uıym retinde assambleıa aıshyqty úles qosýy kerek ekenin aıtty. Tatýlyq pen turaqtylyq, rýhanı damý bizdiń basty baǵdarymyz degen ol Joldaýda aıtylǵan birqatar baǵytqa toqtaldy.
– Memleket basshysy Qasym-Jomart Toqaev Qazaqstan halqyna arnaǵan kezekti Joldaýynda el damýyna serpin beretin negizgi salalardy damytýdyń mańyzdy qadamdaryn atady. Laıyqty nátıjege qol jetkizý úshin kásibılik pen adaldyq basty qundylyq ekenin basa aıtty. Aldaǵy 2025 jyl «Jumysshy mamandyqtar jyly» dep jarııalanyp, kásibı bilim júıesin reformalaýǵa qatysty bastama kóterildi. Prezıdenttiń jumysshy mamandyqtaryn dáripteý arqyly qoǵamda eńbekqor jáne naǵyz maman bolý ıdeıasyn nasıhattaıtynyn aıtqany – mıllıondaǵan qarapaıym eńbek adamdaryna baǵyttalǵan úlken qurmet. Adal ári tabandy eńbegimen tabysqa jetken azamattardyń qoǵamdaǵy mártebesin kóterý – oryndy is. Barsha QHA músheleri Otanymyzdyń órken jaıýyna eńbek etýimiz kerek, – dedi M.Ázilhanov.
Joldaýda aıtylǵan taqyryptarǵa jekeleı toqtalǵan etnomádenı birlestikterdiń jetekshileri de oıyn ortaǵa saldy. «Barbang» kúrdter qaýymdastyǵy Almaty fılıalynyń jetekshisi Anvar Nadırovtiń sózinshe, dástúrli Joldaý eldegi ekonomıkalyq turaqtylyqty qamtamasyz etýge baǵyttalǵan bastamalarmen qatar, zań men tártip salasyna úlken jaýapkershilik júktep otyr.
– Prezıdent keıingi jyldary aýyl sharýashylyǵyna kóp kólemde qarjy bólinip jatqanyn aıtyp, elde 2 mln iri qara mal men 3 mln ýaq mal sanda bar da sanatta joq bolyp anyqtaldy dep saladaǵy shıkilikti atap kórsetti. Mal sharýashylyǵy mamany bolǵannan keıin, osyndaı shıkiliktiń Prezıdent nazaryna ilikkeni olqylyqtyń ornyn toltyrady dep úmittenemin. Sondyqtan bul Joldaýdy jańa múmkindikter men bolashaqqa degen senimniń kórinisi dep qabyldaýǵa bolady. Árqaısysymyz el damýyna úles qosý maqsatynda Joldaýda qamtylǵan bastamalardy qoldap, óz salamyz boıynsha mindetterdiń oryndalýyna úles qosýymyz qajet. Áleýmettik-ekonomıkalyq damý, qoǵamda bolyp jatqan túrli ózgerister eldi órkendetýge negizdelgen ilgeri qadam dep esepteımin, – deıdi A.Nadırov.
Kezdesýde qoǵamda qyzý talqylanyp jatqan atom elektr stansasyn salý máselesi de talqylaýdan tys qalmady. El aýmaǵyndaǵy irili-usaq stansalardyń qýat-kózi qajetti suranysty qamtýǵa qaýqarsyz degen birqatar sarapshy máselege saýatty kózben úńilýimiz qajet dep pikir bildirdi.
– Atom elektr stansasyn salý máselesi – qoǵamda úlken suranyspen talqylanyp jatqan taqyryp. Prezıdent Joldaýynda bul jiti aıtylyp, halyqtyq referendým negizinde sheshim qabyldanatyn boldy. О́z basym bul bastamany qoldaımyn. Nege desek, damyǵan memleketter bul baǵytta áldeqashan ońtaıly qadamǵa barǵan. Biz de sol kóshke ilesýimiz kerek. О́ndirisimizdi órkendetip, ekonomıkalyq qýatymyzdy arttyrý úshin energetıkalyq táýeldilik máselesin túbegeıli sheship alǵanymyz jón. Energııa tek óndiriske ǵana emes, qoǵam ómirindegi barlyq salanyń damýy, bizdiń sapaly ómir súrýimiz úshin qajet. Kásipker retinde Belgııa, AQSh, Eýropa elderin jıi aralaımyn. Mundaı stansalardyń talaıyn óz kózimmen kórdim. Orynsyz fobııadan arylyp, naqty qadam jasaıyq der edim. Energııa tapshylyǵynyń rettelýi sheteldik ınvestorlardy kóptep tartýǵa, halyqty turaqty jumys ornymen qamtýǵa, energııa qoryn kóbeıtýge jol ashady. Tehnıkalyq talaptar eskerilip, joba sala ǵalymdarymen keńese júzege assa ıgi – dep atap ótti Qazaqstan uıǵyrlary etnomádenı birlestiginiń tóraǵasy Abdýlhalıl Dolkýntaı.
ALMATY