12 qyrkúıek kúni Mańǵystaý oblysy Beıneý aýdanyndaǵy Jumaǵalı Qaldyǵaraev atyndaǵy jalpy orta mekteptiń 16 oqýshysy aýrýhanaǵa jetkizilgen. Dárigerlerdiń aıtýynsha, olar astan ýlanýy múmkin, dep jazady Egemen.kz oblystyq densaýlyq saqtaý basqarmasyna silteme jasap.
Keshe keshki saǵat 18:34 shamasynda atalǵan mekteptiń 16 oqýshysy ish aýrýymen medısınalyq kómekke júgingen. Mamandar tıisti em-shara júrgizgennen keıin oqýshylar úılerine jiberilgen.
Aýdandyq sanıtarlyq-epıdemıologııalyq basqarma mekteptegi astan, aýyzsýdan synama alyp, saraptamaǵa jóneltken.
«Qabyldaý bóliminde balalarǵa regıdratasııa jáne ınfýzıondy terapııa jasaldy. Saǵat 21:43-tegi jaǵdaı boıynsha 16 bala úıine qaıtaryldy. Oqýshylardyń densaýlyǵy birqalypty. Búgin barlyǵy mektepke bardy», delingen oblystyq densaýlyq saqtaý basqarmasy taratqan habarlamada.