Ol jumys oryndaryna qaýipti emes
Iri elder arasyndaǵy geosaıası múddelerden týyndaǵan teketirester men munaı baǵasynyń álemdik deńgeıde quldyraýy qarapaıym halyqty biraz alańdaýshylyqqa alyp kelgen bolatyn. Ásirese, munaıly Mańǵystaýda «munaı mekemelerinde qysqartýlar júredi eken» nemese «munaı baǵasynyń tómendeýine baılanysty munaıshylardyń da aılyq jalaqysy azaıatyn bolypty» degen áńgimeler qylań bere bastaǵan edi. Alaıda, Mańǵystaý oblysy ákiminiń baspasóz qyzmeti usynǵan aqpar ólkedegi atalmysh saladaǵy aldyn alý sharalarynyń barysynan habardar etti. Aıtýynsha, Mańǵystaý oblysyndaǵy iri munaı óndirýshi kompanııalar óz jumysshylary aldyndaǵy áleýmettik mindettemelerin oryndaıtyndyqtaryn naqtylaı túsken.
Qańtardyń 15-i kúni Mańǵystaý oblysynyń ákimi A.Aıdarbaev óńirdegi iri munaı jáne gaz óndirýshi kompanııalar basshylarymen kezdesip, munaı baǵasynyń tómendeýine baılanysty aldaǵy ýaqytta eńbek ujymdaryndaǵy áleýmettik turaqtylyqty saqtaý máselesin talqylady.
О́tken jyldyń basynan bastap álemdik naryqta munaı baǵasynyń tómendeýi baıqalǵandyǵyn, qazirgi tańda barreline 46 dollar bolyp turǵandyǵyn, onyń aımaqtaǵy munaı óndirýshi kásiporyndardyń qarjylyq-sharýashylyq ahýalynda kórinis bergendigin aıtqan A.Aıdarbaev qazirgi tańdaǵy eń ózekti másele oblystaǵy kásiporyndar qyzmetiniń turaqtylyǵyn ustap qalý ekendigin nazarǵa berdi.
– Aldymen jumys oryndaryn saqtap, jalaqynyń tómendeýi men jumys oryndarynyń qysqarýyna jol bermeý kerek. Biz bıyl jáne aldaǵy jyly barlyq kásiporyndarda ártúrli jaǵdaılarda turaqtylyqty, jumys oryndaryn saqtaý úshin qajetti tıisti sharalardy qamtamasyz etýge tıispiz. Bul kásiporyn basshylary men kásipodaq uıymdary tóraǵalarynyń aldynda turǵan mindet. Biz óńir turǵyndarynyń áleýmettik ahýalynyń nasharlaýyna jol bermeý úshin barlyq múmkindikterdi qarastyrýymyz qajet, – dedi ol.
Mańǵystaý oblysy ákiminiń orynbasary Sh.Ilmýhanbetova elimizdiń jáne Mańǵystaý oblysynyń keleshektegi ekonomıkalyq saıasatynyń negizgi baǵyttary týraly habardar etse, «Mańǵystaýmunaıgaz» AQ, «О́zenmunaıgaz» AQ, «Qarajanbasmunaı» AQ jáne «BýzachıOpereıtıng LTD» kompanııasy fılıaly basshylary 2015 jylǵa arnalǵan óndiristik josparlary týraly baıandady.
A.Aıdarbaev Mańǵystaý oblysy ákimdigi men Mańǵystaý oblystyq kásipodaqtar keńesi, Mańǵystaý oblystyq Ulttyq kásipkerler palatasy jáne kásiporyndar basshylary arasynda áriptestik memorandýmyna qysqa merzimde qol qoıýǵa usynys bildirdi. Qujatta kásiporyndardyń eńbek ujymdarynda turaqtylyqty qamtamasyz etý, onyń ishinde jumys oryndaryn saqtaý jáne qyzmetkerlerdi negizsiz jappaı jumystan bosatýdyń aldyn alý, taraptardyń kelisilgen sharalardy Qazaqstan zańnamalaryna saı júzege asyrý arqyly áleýmettik saldardy barynsha azaıtý jumystary aıqyn jazylǵan. Memorandýmmen tanysýdan soń taraptar oǵan 20 qańtarda qol qoıady dep kútilýde.
Árıne, qarjy-ekonomıkalyq turǵydaǵy álemdik ahýaldyń, halyqaralyq jaǵdaıdyń qalaı bolmasyn ózge elderge ózindik áseri bolmaı turmaıtyny belgili. Alyp elderdiń óziniń saly sýǵa ketkendeı áýre-sarsańǵa túsken kezeńde biz ishki turaqtylyqty saqtap qala alsaq – ol úlken mereı.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.