2-4 qazan aralyǵynda Qazaqstanda alǵash ret ENACTUS Stýdenttik kásipkerliktiń álemdik kýbogy ótedi. Oǵan 33 eldiń stýdentteri, kásipkerleri, akademııalyq kóshbasshylary men korporatıvtik bıznes basshylary qatysady, dep habarlaıdy Egemen.kz.
ENACTUS World Cup – kásipkerlik qyzmet arqyly áleýmettik bastamalar men progresti kórsetýge múmkindik beretin is-shara. Ol 2001 jyldan beri ótkizilip keledi. Elimizdiń álemdik kýbokty ótkizý quqyǵyna ıe bolýy – bul ENACTUS-tyń Qazaqstannyń sońǵy 15 jyldaǵy jetistikterin moıyndaıtynyn jáne halyqaralyq áriptester tarapynan senim artylyp otyrǵanyn kórsetedi.
ENACTUS stýdentteriniń barlyq bıznes-jobalary BUU-nyń turaqty damýynyń 17 maqsatyna jetýge baǵyttalǵan jáne bolashaq bıznes kóshbasshylary mansabynyń bastamasy bolyp sanalady. Álemdegi 1000-nan astam ýnıversıtet stýdentterdiń kóshbasshylyǵy men iskerlik daǵdylaryn damytý úshin osy platformany paıdalanady.
QR Ǵylym jáne joǵary bilim mınıstrliginiń málimdeýinshe álemniń túkpir-túkpirinen keletin 2000 jas kásipker ekologııalyq máselelerdi sheshýdiń ınnovasııalyq tásilderin kórsetetin, turaqty qoǵamdastyqtardyń damýyna yqpal etetin jáne adamdardyń ómirin oń ózgeristerge shabyttandyratyn óz jobalaryn usynady.
Atalǵan sharada elimizdiń namysyn ENACTUS KAZAKHSTAN 2024 Ulttyq chempıony, Taldyqorǵan qalasyndaǵy I.Jansúgirov atyndaǵy Jetisý ýnıversıtetiniń komandasy qorǵaıdy.